![ramaaaa-573x350.jpg ramaaaa-573x350.jpg](https://fv.al/data/attachments/16/16569-b8f1acd140713553b3486c012321fb41.jpg)
Kryeministri Rama nuk ndalet së replikuari në distancë me vendin fqinj, Greqinë dhe aleat ka Facebook-un, aty ku hedh statuse e i përgjigjet ndjekësve. Komenti i kryeministrit është një deklaratë shumë e fortë. Ai thotë se deri tani nuk iu kishte kthyer përgjigje fqinjëve dhe se do ta bëjë nesër në seancën e kuvendit.
Rama thotë se me fqinjët duhet të kemi marrëdhënie të shkëlqyera, por shton se ka marrë fund koha kur fqinji i pasur i tregonte arat fqinjit të varfër, ndërsa i përgjigjet një komentuesi që i kërkon kryeministrit të hedhë përsëri foto me Akropolin që të “çmenden grekët”.
“Neser ne kuvend do ta marrin pergjigjen time per sa kane thene keto dite, fqinjet tane te vjeter e te dashur, me te cilet duhet dhe duam te kemi marredhenie te shkelqyera! E qe t’i kemi te tilla, na duhet patjeter te jemi te hapur, te vertete e te barabarte me njeri – tjetrin! Sepse koha e fqinjit te pasur qe i tregonte arat fqinjit të varfër ka marre fund mes nesh”, thotë Rama.
Kryeministri Rama i ktheu përgjigje Athinës zyrtare dy ditë më parë, pas përplasjes me shtetin shqiptar për çështjen e Himarës. MPJ-ja greke paralajmëronte Shqipërinë se do të vendoste veton për procesin e integrimti në BE, në rast se nuk zgjidhej drejt çështja e pronave në Himarë, ndërsa MPJ shqiptare u shpreh se këto ishin çështje të brendshme që nuk i takonin fqinjëve.
Të dyja shtetet thirrën ambasadorët përkatës për sqarime, ndërsa kryeministri “çmendi” edhe mediat greke kur publikoi në Facebook një gravurë të Athinës të vitit 1670 ndërsa rikujton se Akropoli i lashtë është ende në këmbë falë një shqiptari, Gjergj Dushmanit, i cili i kërkoi flotës veneciane të mos e bombardonte Athinën.
(ma.ar/BalkanWeb)