Letra tonditëse e amerikanes që u vra nga ISIS-i (dokument)
Publikuar: 22:38 / 10.02.2015
Prindërit e amerikanes 26 vjeçare, Kayla Mueller thanë dje se kishin marrë konfirmim se vajza e tyre që ishte peng e ISIS-it është vrarë. Mueller ishte rrëmbyer nga ISIS në gusht 2013 dhe familja e saj ka bërë publike një kopje të një letre të papublikuar më parë që vetë Kayla u kish dërguar familjarëve në pranverën e vitit 2014, ndërkohë që ndodhej në qelitë e ISIS.
Lexojeni të plotë letrën të cilën Kayla Mueller ua kisht dërguar prindërve derisa ishte peng e ISIS-it:
“Të gjithë ju, nëse e merrni këtë letër, kjo do të thotë që unë jam ende peng, por shoqet e qelisë sime (duke filluar nga 11/02/2014) janë liruar. U kam kërkuar të kontaktojnë me ju + t’ju dërgojnë këtë letër. ثshtë e vështirë të dish çfarë të thuash. Ju lutem, dua të dini se jam në një vend të sigurtë, krejt e palënduar + shëndetplotë (në fakt kam vënë peshë); Jam trajtuar me respekt dhe mirësi maksimale.
Do të doja t’ju shkruaja të gjithëve ju një letër të mirëmenduar (por nuk e dija nëse shoqet e qelisë do të largoheshin në ditët në vijim apo në muajt në vijim) dhe mu desh ta shkruaj letrën me paragrafë. Vetëm mendimi për ju më bën të më shpërthejnë lotët.
Nëse mund të them se kam “vuajtur” përgjatë gjithë kësaj përvoje, kjo vuajtje ka ardhur vetëm prej vetëdijësimit se çfarë ju kam bërë të ndieni; nuk do ju kërkoj asnjëherë të më falni sepse nuk e meritoj faljen.
Më kujtohet mami që më thoshte se në fund e vetmja gjë që ti ke është Zoti. Kam mbërritur në një moment të përvojës sime ku, në çdo kuptim të fjalës, ia kam dorëzuar veten Krijuesit tonë, sepse në kuptimin e plotë të fjalës, nuk kisha askënd tjetër… + me Zotin + prej lutjeve tuaja jam ndier si në një djep, në rënie të lirë.
Faksimilje e letrës së Kayla Muellner, të cilën ajo ua kishte dërguar prindërve nga qelia e burgut të ISIS-it
Kam parë errësirën dhe dritën + kam mësuar se në çdo burg, njeriu mund të jetë i lirë. Jam mirënjohëse. Kam arritur të kuptoj se ka mirësi në çdo situatë, ndonjëherë thjeshtë duhet ta kërkojmë. Lutem çdo ditë që, në mos asgjë tjetër, të paktën ju të keni ndier një afri + një dorëzim tek Zoti gjithashtu + të keni krijuar një lidhje dashurie + mbështetje për njëri-tjetrin…
Më mungoni të gjithë, sikur të ketë qenë një dekade ndarjeje me forcë. Kam patur shumë orë për të menduar, për të gjithë gjërat që do të bëj me Lexin, për udhëtimin e parë me familjen, takimin e parë në aeroport. Kam patur shumë orë për të menduar se vetëm mungesa juaj më ka bërë sot, në moshën 25 vjeç, të kuptoj vendin tuaj në jetën time. Secili prej jush është dhurata ime dhe unë nuk do të isha ky person nëse ju nuk do të ishit pjesë e jetës sime, nëse nuk ishit familja ime, mbështetja ime.
Nuk dua që negociatat për lirimin tim të jenë detyra juaj, nëse ka një opsion tjetër rrokeni, edhe pse do të duhej më shumë kohë. Kjo nuk duhej të bëhej asnjëherë barra juaj. U kam kërkuar këtyre grave t’ju mbështesin; ju lutem pranojeni kërkesën e tyre. Nëse nuk e keni bërë ende mund të kontaktoni ata që kanë një nivel eksperience me këta njerëz.
Askush nga ne nuk mund ta dinte që do të zgjaste kaq shumë, por edhe po luftoj në anën time në ato mënyra që mundem, kam ende shumë energji brenda meje për të luftuar. Nuk po thyhem dhe nuk do të dorëzohem, pavarësisht sa kohë do të duhet. Pak muaj më parë shkruajta një këngë që thotë: “Ajo pjesë e imja që më dhemb më shumë, më bën gjithashtu të ngrihem nga shtrati, pa shpresën tuaj nuk do të kish mbetur asgjë…”
Mendimi i dhimbjes tuaj është burimi i dhimbjes sime, por njëkohësisht mendimi i ribashkimit tonë është burimi i forcës sime.
Ju lutem bëni durim, jepjani dhimbjen tuaj Zotit. E di që do të donit që unë të mbetesha e fortë. Pikërisht këtë po bëj. Mos kini frikë për mua, vazhdoni të luteni ashtu si dhe unë dhe dashtë Zoti do të jemi shumë shpejt bashkë.
Me gjithë dashurinë,
Kayla”, përfundon letra. /bota.al/
