Ekzekutohet me 2 plumba në kokë pronari i diskos, mister motivet
ثshtë vrarë me dy plumba në kokë pronari i diskos “Tekila” në Elbasan. Almir Cani 37 vjeç, me banim në lagjen “Dyli Haxhire Myzyri”, pronar i diskos “Tekila” në këtë qytet u vra dy net më parë nga një person, që sipas policisë është identifikuar, por emri i tij nuk bëhet i ditur për arsye hetimi. Sipas dëshmive të marra nga vendi i ngjarjes, rezulton se 37-vjeçari ndodhej në banesë në kohën kur është thirrur për takim nga një person, i cili sapo është përballur me Almir Canin në fund të shkallëve, e ka qëlluar me dy plumba pistolete në kokë. Më pas ai është zhdukur në drejtim të paditur duke përfituar nga errësira e natës.
Viktima është dërguar nga familjarët për në spital, por me gjithë ndihmën e dhënë nga mjekët ka qenë e pamundur që ai të mbijetojë, për shkak të goditjeve fatale në kokë. Në vendin e ngjarjes kanë shkuar shërbimet e policisë dhe një grup hetimor. Policia ka rrethuar zonën dhe ka ngritur postblloqe në rrugë me synimin për të rënë në gjurmë të vrasësit. Ende nuk ka një pistë zyrtare për shkakun e këtij ekzekutimi. Për hetimin e kësaj ngjarjeje është ngritur një grup hetimor, i cili deri më tani ka siguruar provat në vendin e ngjarjes. Ndërkohë janë shoqëruar e marrë në pyetje 15 dëshmitarë. Burime zyrtare të drejtorisë së policisë së qarkut Elbasan deklaruan gjatë ditës së djeshme se autori i këtij krimi është identifikuar, por për arsye hetimi emri nuk bëhet i ditur. Policia po punon intensivisht për kapjen e tij. Ndërkohë po bashkëpunohet me prokurorinë për të zbardhur plotësisht rrethanat e ngjarjes.
Ekzekutimi i Almir Canit është kryer rreth orës 23:00. Sipas familjarëve, ai ka qenë duke luajtur me vajzën e tij të vogël në një nga dhomat e shtëpisë kur është thirrur në celular nga vrasësi. Duket se mes tyre ka pasur njohje, pasi Almir Cani ka zbritur qetësisht nga banesa pa u thënë asgjë familjarëve. Pak çaste më vonë janë dëgjuar dy krisma të mbytura arme. Familjarët kanë kujtuar se kanë qenë kapsolla dhe e kanë kaluar me indiferentizëm zhurmën. Vetëm kur vajza e vogël ka nisur të qajë duke kërkuar të atin, ata kanë dalë poshtë për ta kërkuar, por e kanë gjetur të shtrirë në asfalt të larë në gjak. 37-vjeçari është dërguar menjëherë në spital, por sipas mjekëve ai kishte arritur i vdekur klinikisht për shkak të hemorragjisë së madhe dhe goditjeve në tru.
Për vrasjen është lajmëruar policia, e cila ka shkuar menjëherë në vendin e ngjarjes. Më pas kanë arritur edhe ekspertët dhe grupi hetimor. Familjarët dhe burime hetimore bënë të ditur se në vendin e ngjarjes nuk gjetën as telefonin e as gëzhojat e armës. Me një qetësi të çuditshme, pas ekzekutimit vrasësi i ka marrë celularin dhe në errësirën e natës ka mundur të gjejë edhe gëzhojat e plumbave të pistoletës me të cilën e ka qëlluar dy herë në kokë. Vrasja duket e parapërgatitur dhe tepër e studiuar. Atentatori ka zhdukur çdo gjurmë për të mos u identifikuar. Ndërsa vrasja mendohet se është kryer me pistoletë me silenciator. Mister mbeten shkaqet e kësaj vrasjeje. Policia ka deklaruar zyrtarisht dje se e ka identifikuar autorin, por emri nuk bëhet i ditur për arsye hetimi. Sipas skedës së policisë, para pak vitesh Almir Cani u akuzua nga e dashura me të cilën bashkëjetonte, se u detyrua nga ai për ushtrim prostitucioni. Ata kanë bashkëjetuar në Itali dhe kishin edhe një vajzë. Por më pas ajo u pendua dhe dëshmoi në polici se gjithçka e kishte bërë në emër të xhelozisë, pasi ai ishte i dashuruar me një vajzë tjetër. Kaluan disa vite dhe Almir Cani krijoi familje me një lidhje të re. Nga kjo martesë ai ka sërish një vajzë. Familjarët thanë se nuk kanë asnjë dyshim lidhur me këtë vrasje. Ata kërkojnë nga policia dhe organet e drejtësisë që të zbardhet e vërteta për të mësuar arsyet.
Burimi:MAPO
