Publikohet video e rrëmbimit të Enver Stafukës, i cili u dyshua në vitin 2013 si autori i vjedhjes së automjetet që u përdor nga autorët për vrasjen e kryekomisarit Dritan Lamaj.
“News 24” transmetoi sot videon e rrëmbimit të 48-vjeçarit, ngjarje e cila ndodhi më 8 shkurt 2015 pranë komisariatit të policisë në Fushë Krujë nga 4 persona të veshur si policë.
Nga pamjet e videos së kamerave të sigurisë duket Stafuka që del nga lokali rreth orës 19:47 dhe tenton të hipë në automjetin e tij. Por në këtë moment tre persona shkojnë tek makina dhe e prangosin.
Pas prangosjes së Stafukës afrohet një mjet tip “Golf”. Stafuka futet në pjesën e pasme të makinës. Makina me Stafukën niset me shpejtësi drejt Tiranës. 48-vjeçari njihet nga policia si person me precedentë penalë, pasi është dënuar katër herë.
(Enver Stafuka)
Sipas hetuesve telefoni i Stafukës natën e grabitjes së BMث-së në Durrës, ka bërë të njëjtin itinerar me telefonin e të zotit të makinës së vjedhur në Durrës si dhe me telefonin e Gentjan Bejtjas, i cili gjithashtu u arrestua. Të dy më 13 nëntor 2013 u shpallën të pafajshëm për këto akuza.
Stafuka është shoqëruar 7 herë në polici mbi çështjen “Lamaj”. Por vetë Stafuka ka kundërshtuar akuzën ndaj tij, duke thënë se natën e vjedhjes së makinës, ai ka qenë në shtëpinë e tij me gruan dhe fëmijët. Stafuka është baba i katër fëmijëve.
Dritan Lamaj u ekzekutua pasditen e 24 shkurtit, për vrasjen rreth 10 orë më pas u arrestua në Selanik biznesmeni i njohur Arben Frroku.
Ndërkohë familja e Stafukës kërkon nga policia zbulimin e fatit të Enverit, i cili ndodhet i zhdukur prej 8 ditësh tashmë.
/Shekulli