Një dëshmi tronditëse, gatigati në kufijtë e të pabesueshme është dhënë ditën e djeshme nga Mirelë Buzalli, 37-vjeçarja që masakroi të shoqin duke i marrë jetën në gjumë. Një histori e frikshme jo vetëm në aktin makabër por edhe në gjithçka që është deponuar prej gruas tek hetuesit e çështjes, të cilët duket se e kanë marrë me rezerva gjithçka është thënë prej gruas, nënë e tre fëmijëve, të cilët tashmë janë lënë në duart e gjyshërve të tyre. Historia që sipas saj nis që nga koha e dashurisë së tyre, ka pikërisht në themel faktin e besimeve të ndryshme fetare që kishin vajza dhe djali.
Mirela dhe Shkëlzeni ishin bashkë prej 16 vitesh dhe se djali i madh i tyre Egzoni është 14 vjeç. Njëkohësisht bëhet me dije se në rrëfimin e saj gruaja, nënë e tre fëmijëve ka pretenduar se ai e rrihte, e fyente dhe madje kishte tentuar edhe ta digjte të gjallë. Mirela, në rrëfimin tronditës i ka treguar policisë dhe prokurorit të gatshëm se prej shumë kohësh çifti ishte ftohur. Ndonëse flinin në një dhomë ata flinin veçmas dhe sipas saj sëpatën me të cilën i mori jetën bashkëshortit të saj 41 vjeç, e kishte marrë në dhomën e gjumit. “Po, ishte aty. Im shoq e mbante brenda dhomës së gjumit dhe më kërcënonte herë pas here më të. Atë natë nuk fjeta fare dhe e kam vrarë duke u zbardhur. Djali i madh, Egzoni dhe vajza kanë shkuar te gjyshërit, ndërsa unë mora djalin e vogël dhe shkova me të në policinë e Vaut të Dejës”.
Kështu ka treguar gruaja në lidhje me gjithçka ka ndodhur mes çiftit prej shumë vitesh ndërsa ajo mendon se një prej personave që ka ndikuar për keq në lidhjen e tyre ka qenë edhe e ëma e djalit, vjehrra. “Ajo i ka thënë gjithmonë tim shoqi se s`na duhet në shtëpi një nuse katolike. Madje edhe kur më leu me benzinë e desh më dogji, Shkëlzeni më tha se duhej të më digjte se nuk kishte faj nëna që thoshte se ti s`duhet të ishe në shtëpinë tonë”. Gruaja mësohet ti ketë treguar policisë me detaje konfliktet e herëpashershme mes tyre ndërkohë që ajo ka rrëfyer edhe dhunën sistematike jo vetëm fizike që ushtronte Shkëlzeni ndaj saj. Ajo ka mohuar të kishte probleme xhelozie mes tyre pasi ata ishin të ndarë prej shumë kohësh. Por policia ende nuk ka mundur të zbulojë se cili ka qenë konflikti i natës së krimit mes tyre, pasi gruaja i mëshon në të gjitha dëshmitë e saj vetëm faktit se ajo është torturuar
Nikoleta Kovaçi