Malsi
Anëtar i Nderuar
Në kulmin e krizës dhe në kohën kur buxheti është shkurtuar për shkak se financat nuk arrijnë dot të mbledhin të ardhurat në arkën e shtetit, qeveria ka gjetur kohën për të pajisur me 29 automjete luksoze personalitetet e larta.
Vizion Plus ka zbuluar se qeveria do të shpenzojë miliona dollarë për mjete luksi në një kohë kur ekonomia është në rrezik, kur varfëria po shtohet, kur papunësia është në rritje dhe kur mijëra shqiptarë të aftë për punë e kanë braktisur vendin për shkak se nuk arrijnë të gjejnë punë.
Sipas këtij televizioni, Këshilli i Ministrave i ka ngarkuar si detyrë Gardës së Republikës që të zhvillojë një tender për marrjen e automjeteve, por pa përcaktuar fondin limit që do t’i zbritet buxhetit.
Pjesa më e madhe e makinave që do të blihen janë të tipit “Jaguar” me fuqi motorike të mëdha, ndërkohë që specifikimet janë nga më absurdet.
Në dosjen për blerjen e këtyre makinave luksoze në të cilën jepen detajet e mjeteve që do merren, renditen opsionet e makinës, që nga numri i cilindrave, xhamat e errët e deri te timoni multifunksional me 3 krahë dhe aplikacione alumini apo airbag të dritaret dhe sinjalizues për presionin e gomave.
Vlera e një automjeti të tillë, sipas faqes zyrtare të kompanisë që i prodhon, pa llogaritur opsionet ekstra, nis nga 95 mijë dollarë. Nëse të gjitha makinat do të kenë të njëjtën vlerë, fondi që do të shpenzohet do të arrijë në 2 milionë e 755 mijë dollarë.
E kontaktuar nga Vizion Plus, Garda e Republikës u shpreh se nuk mund të nxirrte dot fondin që i duhet ministrive për të paguar makinat, sepse informacioni është i klasifikuar, por burimet në këto dikastere thonë se pagesa do të bëhet përgjatë 4 viteve, duke qenë se nuk mund të sigurojnë menjëherë të gjithë shumën brenda një viti.
Ndryshe nga shumë tendera të tjerë, ky tender do të zhvillohet në diskrecion të plotë dhe jo përmes Agjencisë së Prokurimeve Publike.
Garda thotë se procedura është sekrete për shkak të sigurisë të personaliteteve të larta, por në fakt e shkuara jep fakte të tjera. Shumë automjete në vitet e mëparshme edhe pse kanë qenë për funksionarët e lartë janë marrë me tender të hapur.
Lapsi.al u interesua për tenderin dhe nga disa burime të rezervuara mësoi se ai pritet t’i jepet një koncesionari makinash në pronësi të një miku të kryeministrit Edi Rama.
Deri tani opozita e ka akuzuar kryeministrin se u ka dhënë miliona euro në tendera publikë miqve të tij. Pandi Carapulit që ka ndërtuar vilën në Surrel, sipas opozitës, Rama i ka dhënë tenderin 5 milionë euro për rikonstruksionin e zyrave të OSHEE. Safet Gjicit, kandidatit për bashkinë e Kamzës, i ka dhënë gjithashtu tendera disa milionësh e po kështu edhe deputetit Pjerin Ndreu.
Një tjetër akuzë e bërë nga opozita në lidhje me tenderat publikë është ajo për kompaninë e drejtuar deri në shtator të vitit 2013 nga ministri i shëndetësisë Ilir Beqja, e cila vetëm në 22 muajt e fundit ka fituar 28 tendera.
Akuzat për dhënie tenderash njerëzve pranë kryeminstrit vijnë pak kohë pas publikimit të raportit konfidencial të OSBE –së, në të cilin thuhej se kreu i qeverisë shqiptare, Edi Rama dyshohet se ka 200 milionë euro pasuri dhe se, edhe pse është përfolur për përfitimin e një tarife prej 10 deri në 20 % për lejet e ndërtimit kur drejtonte Bashkinë e Tiranës, ai është treguar “shumë i kujdesshëm për të operuar nëpërmjet personave të tretë dhe ka mohuar vazhdimisht çdo përfshirje në korrupsion”.
Lapsi.al