Në mesin e rasteve të proceduara në Gjykatat e Republikës së Kosovës lidhur me zhvillimin e trafikimit, numri i femrave të involvuara në këtë veprimtari vjen duke u rritur. Kohëve të fundit vërehet edhe një shtim i femrave që vijnë nga Shqipëria, të përfshira në ushtrimin e prostitucionit. Lehtësirat e kalimit në kufi, si dhe prania e madhe ndërkombëtare, kryesisht e meshkujve në Kosovë ka favorizuar zhvillimin e trafikut apo të ushtrimit të prostitucionit të vajzave e grave shqiptare në Kosovë, duke përfshirë njëkohësisht edhe një numër të konsiderueshëm të femrave kosovare.
Prezantohen si kameriere…
Sipas një raporti të Policisë së Kosovës, Shqipëria renditet e treta për nga numri i femrave shqiptare që ushtrojnë prostitucion në Kosovë, por me një përqindje të vogël, krahasuar me dy vendet e para që i mbajnë Moldavia e Bullgaria. Ndërkohë është shumë e qartë se të gjitha rastet nuk janë të evidentuara në statistikat e policisë. Kjo bënë që kurrë mos të dihen statistikat e sakta të këtij “fenomeni“. Kjo veprimtari nuk ushtrohet në Kosovë vetëm nga kosovarët apo ndërkombëtarët me qëndrim në Kosovë, por edhe nga njerëz nga Shqipëria, siç është një rast të cilin drejtoria e policisë në Qarkun e Kukësit e ka konfirmuar për një medium shqiptar, duke thënë se vitin e kaluar në Tropojë, një femër që kishte ushtruar prostitucion në Kosovë denoncoi dy tutorët e saj që ishin nga Shkodra e Korça. “Dy tutorët që kishin trafikuar vajzën nga Tropoja janë arrestuar dhe më pas janë liruar nga gjykata, por sërish janë shpallur në kërkim”. As grilave nuk u kanë shpëtuar shtetas shqiptarë që merren me këtë veprimtari në Kosovë, duke i involvuar në të jo vetëm femrat nga Kosova, por edhe ato nga Shqipëria. Ndërkohë për numrin e femrave shqiptare që ushtrojnë aktivitet prostitucioni në Kosovë është një problem me të cilën merret Policia e Kosovës, që në disa raste i kanë dhënë një goditje mjaft të duhur luftimit të kësaj dukurie, por që nuk do të thotë se është zhdukur kjo veprimtari, pasi që pohohet se ushtrohet në Prishtinë. Me gjithë vënien para përgjegjësisë së femrave, që merren me këtë veprimtari, duke ardhur ato në Kosovë nga vende të ndryshme me apo pa dokumentacion të rregullt, duke qenë të shoqëruara me bashkëpunëtorët e tyre, të cilët i prezantojnë si të afërmit e tyre, bëjnë policinë që të mos kenë mundësi ndalimi. Edhe Policia e Kosovës ka hasur në vështirësi për t’i kapur femrat nga Shqipëria që ushtrojnë prostitucion, pasi ato prezantohen si kameriere apo këngëtare në motelet ku ato shërbejnë. Ka raste kur këto femra përfundojnë në qendër të rehabilitimit dhe pas kalimit nëpërmes kësaj qendre, shumica e këtyre femrave serish i janë kthyer “profesionit“ të mëparshëm, madje ato janë të vendosura për ta ushtruar “profesionin” e tyre edhe më tej.
Vajzat e “rebeluara”
Femrat që kapen në Kosovë si të dyshuara për trafik prostitucioni, kryesisht deportohen në Shqipëri, përveç atyre rasteve kur ato kapen në flagrancë. Kjo vlen edhe për femrat që vijnë nga Moldavia apo vende të tjera. Të deportuarat u takojnë moshave të ndryshme si adoleshente, të rritura, gra etj. Pjesa dërmuese e tyre kanë zgjedhur këtë rrugë si mënyrë jetese, ndërkohë ka prej tyre që arrijnë në Kosovë me shpresë për t’u martuar, apo për të krijuar familje, por një ëndërr e tillë në realitet u shndërrohet pa vullnetin e tyre në diçka më të rëndë, pra “përfshirje në prostitucion“. Në mesin e tyre nuk përjashtohen as rastet e femrave të mbyllura, siç e kishim rastin e një nëne kosovare, e cila vinte nga rrethina e Kaçanikut e që kishte trafikuar vajzën e saj, apo vajza nga fshati që kanë qenë të mbyllura dhe një ditë janë “rebeluar” karshi izolimit të bërë nga ana e prindërve, duke u larguar nga shtëpia pa dijeninë e tyre. Dhe fatkeqësisht ka raste që kanë përfunduar në ushtrim prostitucioni, siç e kishim rastin e një të miture në vitin e kaluar në Fushë-Kosovë (emri i së cilës është i njohur për redaksinë).
