Duhet pranuar, është një ballafaqim i kulturave dhe kjo me vete ka edhe ballafaqimin e ideve dhe mendimeve. Këtu na paraqitet dhe fakti se a duhet ndaluar burka si veshje dhe si të trajtohet kjo çështje brenda ligjeve të vendeve perëndimore të cilat duket se nxisin debat dhe në shoqërinë tonë.
Ky debat në përgjithësi por dhe në forum nuk duhet të kaloj në fyerje personale por në respektim të mendimit të tjetrit, sa do i keq dhe i pa pranueshëm të jetë ai për palët ndër debatuese.
Duhet të kaloj në disa pika për të dhënë vështrimet e mia për këtë temë:
E para, është liria e individit e garantuar me çdo akt ndërkombëtar e nacional dhe e cila në mes tjerash paraqet dhe të drejtën e individit që ai ose ajo të e ushtrojnë fenë e tyre pa u penguar nga të tjerët, si një element kyç i demokracisë sot.
E dyta, është se sa dhe si kjo liri dhe e drejtë e cenon të drejtën e tjetrit? ثshtë bazament i një të drejte dhe lirie të individit që ajo të mos e cenoj lirinë dhe të drejtën e tjetrit. A e cenon lirinë time veshja e dikujt? Mendoj se kjo është pyetja që secili nga ne duhet të parashtrojmë. Sa më cenon liritë dhe të drejtat e mia veshja e dikujt tjetër. Si vishet një roker, një reper, si vishet një hipist si vishet një besimtar indian, mysliman dhe i feve të tjera. A më pengon mua mënyra si vishen ato ose ata?
E treta është te diskriminimi. Perëndimi sot shpreh brengën se a është dëshirë e vet vajzave që të mbulohen apo kjo vjen si rezultat i imponimit nga ana e dikujt, në theks të veçantë nga ana e burrave. Unë personalisht jam kundër imponimit, veshja është zgjedhje e lirë, besimi është zgjedhje e lirë e individit dhe ajo duhet të manifestohet si e tillë.
E katërta është ekspozimi i veshjeve të tilla në publik dhe reagimi qytetar i një pjese dërmuese në Evropë, por dhe në vendet tona dhe sigurisht në forum. Ajo që mua më brengos është fakti se përdoret laiciteti i shtetit për të u arsyetuar se veshja e tillë është e ndaluar në institucione publike. Në Kosovë me akte nën ligjore në institucione gjyqësore është e ndaluar të veshësh minifund, të shkosh në gjykatë gjysmë i zhveshur dhe kjo vlen jo vetëm për punonjësit aty por dhe për palët tjera. Dhe tanimë ne duhet të pyesim njëri tjetrin, duke filluar nga unë, më pengon zhveshja apo veshja dhe ekspozimi i tyre nëpër institucione?
E pesta për të përcaktuar dhe definuar me ligj këtë çështje besoj se duhet të pyetet komuniteti i fesë islame, se cilat janë rregullat e veshjes, çka në të vërtet paraqet mbulesa dhe si konceptohet ajo dhe më pas mund dhe të definohet çka është traditë e vendeve arabe e çka është rregull i shkruar sipas fesë. Kjo i përcakton margjinat dhe vijën ndarëse midis të katër pikave të tjera të cilat unë i kam paraqitur në mendimin që sapo shkrova. Mendoj se janë disa pyetje të mira, të cilat duhet të jepen si përgjigje me kokë të ftohtë dhe jo me emocione. Sigurisht, pa ndjenjën e inferioritetit ndaj dikujt që ka mbulesë në kokë, sepse me rëndësi është çfarë kemi brenda kokës, e jo sipër saj.
ju falënderoj për kohen nëse më lexuat.
.