Pe: Përkujtohet 200-vjetori i Charles Dickens
Londër, 8 shkurt - Ai ka shkruar për jetën në qytetin modern, me avokatët e kriminelët, bankierët, ëndërrimtarët e të papunët. Krijoi personazhe që ende njihen për miliona njerëz, Ebeneezer Scrooge dhe Tiny Tim, Pip dhe Miss Havisham, Fagin dhe Oliver Twist. Dhe këto e bënë yll, në të dyja anët e Atlantikut. Bota të martën shënoi 200-vjetorin e lindjes së Charles Dickens, një ikonë e literaturës britanike, rrëfimet e së cilit konfrontuan padrejtësitë e jetës viktoriane. Aktivitete më të shumta pati në vendlindjen e tij. Trashëgimtari i frontit të Britanisë së Madhe vizitoi “Charles Dickens Museum” në Londër, ku aktorja amerikane Gillian Anderson, e cila ka portretizuar Miss Havisham në “Great Expectations”, ka lexuar disa fragmente nga veprat e novelistit. Princi ka shkuar në “Westminster Abbey” për të vënë kurorë mbi varrin e shkrimtarit, romanet e së cilit “Nicholas Nickleby” e “Oliver Twist” dhe personazhet si Samuel Pickwick e Ebenezer Scrooge, jetojnë ende në adaptime skenike e filmike. Raplh Fiennes, biografja e Dickens Claire Tomalin dhe nipi i autorit, Mark Dickens, kanë marrë pjesë në një ceremoni speciale në “Poet’s Corner”, ku ishte varrosur Dickens në vitin 1870, përkrah me Geoffrey Chaucer, Alfred Tennyson, Samuel Johnson, Rudyard Kipling dhe letrarë të tjerë të mëdhenj. Ngjarja shënoi tubimin më të madh të pasardhësve të Dickens, duke qenë se ishin prezentë mbi 200 familjarë.
“Ky dyqindvjeçar duhet të ndihmojë të rrisim angazhimin tonë për të përmirësuar shumë gjëra të pafavorshme të ditës sonë”, ka thënë dekani i “Westminster”, John Hall, duke iu referuar preokupimeve të Dicnkensit për varfërinë dhe jobarazinë. Apelet e Dickens nuk kanë shenja rënieje as 140 vjet pas vdekjes së tij. Librat e tij mbeten në shtëpi botuese anekënd botës dhe regjisori i filmit Mike Newell është duke punuar për një version të ri të adaptimit të “Great Expectations”, me protagonistë aktorët Helena Bonham Carter dhe Ralph Fiennes. “Google” të martën ka nderuar Dickens me një vizatim që pasqyron disa nga personazhet e tij më të njohur. Eksperienca e Dickens prej punëtori në një fabrikë në moshë të re, derisa babai i tij ishte në burg, e ka frymëzuar për të ndërtuar disa nga personazhet e tij më të famshme, duke përfshirë edhe Fagin në “Oliver Twist”. Novela e tij e parë e shkurtër u publikua më 1833 në Londër. Romani i tij i parë “The Pickwick Papers”, i botuar më 1836 ishte shumë i suksesshëm. Me të njëjtin ritëm vazhduan edhe “Oliver Twist” dhe “Nicholas Nickleby”. Autori nisi udhëtimet në Shtetet e Bashkuara më 1842 dhe 1867, dhe në atë kohë botoi disa nga librat e tij më të njohur, duke përfshirë “"Bleak House," "Hard Times," "Little Dorrit," "A Tale of Two Cities" dhe "Great Expectations." Dickens u lind më 7 shkurt të vitit 1812 në Portsmuth, në bregdetin jugor të Anglisë.
Përvjetori i 200-të i lindjes së Charles Dickens është shënuar edhe në Shqipëri. Me iniciativë të “British Council” në Shqipëri është organizuar java “Dickens on Film”. Sipas medieve shqiptare, në kuadër të këtij aktiviteti, për një javë, do të mbahen aktivitete të shumta kulturore, duke përfshirë shfaqjen e filmave, leximeve të hapura në teatër. Mysafir special i ftuar për këtë eveniment do të jetë shkrimtari e kritiku i mirënjohur Ian Haydn Smith.