Kuvendi pranon kthimin e borxhit Greqisë .

Ligjërisht, qeveria shqiptare duhet t‘i kthejë Greqisë një borxh prej rreth 41 milionë dollarësh. Komisionet parlamentare miratuan dje vendimin e qeverisë për riskedulimin e borxhit të vjetër, i cili është marrë në vitet 1987-1991. Edhe për këtë projektligj, deputetë të opozitës nuk kanë pranuar të marrin pjesë në votim, duke ia lënë në dorë mazhorancës. Miratimi i projektligjit vjen në një kohë kur Kryeministri grek, Kostas Karamanlis, ka konfirmuar vizitën në Shqipërisë në datat 26-27 prill. Gjatë shqyrtimit të vendimit të qeverisë nuk ka pasur debate, si pasojë e mungesës së opozitës, duke krijuar terren të lirë për miratimin e kthimit të detyrimit të vjetër prej rreth 41 milionë dollarësh. "Shqip" publikoi fundjavën e kaluar me faksimile marrëveshjen e kthimit të borxhit, firmosur më 23 mars 2009, nga dy ministrat e Financave, për llogari të Organizatës së Sigurimit të Kredisë së Eksportit, të përfaqësuar nga Janis Pantelidis. Duke bashkangjitur dhe detyrimin tjetër, prej 7.2 milionë dollarësh, i miratuar në fundin e 2009-s, në total qeveria shqiptare ka njohur një borxh që shkon në rreth 50 milionë dollarë. Në relacionin që shoqëron projektligjin nuk jepen sqarime rreth shkakut të krijimit të borxhit, por mësohet vetëm se, pjesa dërrmuese e detyrimit është krijuar nga interesat e papaguara gjatë 17 viteve të tranzicionit. Detyrimi u njoh dhe u rishikua pas shumë negociatave të vështira që Komiteti i Bisedimit të Borxhit Qeveritar kreu me palën greke.

Marrëveshja

Vlera reale e huas është rreth 16.2 milionë dollarë, por duke shtuar edhe interesat, që me kalimin e viteve kanë rritur detyrimin, i gjithë borxhi shkon në 40 694 907 dollarë. Palët kanë rënë dakord që borxhin ta shlyejnë me 20 këste të barabarta 6-mujore, me një afat 10 vjet. I gjithë detyrimi do të shlyhet brenda vitit 2018, kurse në rast vonesash do të aplikohen penalitete që arrijnë deri në 13 për qind mbi shumën (2 për qind mbi normën e interesit). Tani që Kuvendit i Shqipërisë i kanë mbetur edhe dy ditë kohë nga miratimi i plotë i projektligjit, hyrja në fuqi mund të ndodhë në fund të muajit prill. Megjithatë, efektet financiare shtrihen që nga marsi 2009, kurse e gjithë shuma duhet të shlyhet brenda vitit 2018. Kostas Karamanlis do të ulet në Tiranë mesditën e datës 26 prill, direkt nga Sofja, në përfundim të vizitës dyditore në Bullgari me rastin e samitit "Gazi natyror për Evropën, siguria dhe bashkëpunimi".
link: Gazeta Shqip