Një pacient është vetëdjegur në repartin e Dializës së Spitalit Amerikan në shenjë proteste për të kundërshtuar kushtet skandaloze.
Burime nga policia e shtetit bëjnë me dije për Boldnews.al se viktima është rreth 41 vjeç me inicialet L.C ndërsa është plagosur edhe një pacient tjetër.
Mësohet se ndërsa ishte duke kryer procesin e dializës, ai i ka venë flakën vetes me benzinë dhe më pas zjarri është përhapur në të gjithe pavionin, duke plagosur edhe një tjetër pacient.
Forcat zjarrfikëse që shkuan në vendin e ngjarjes bënë të mundur vënien nën kontroll të tyre.
Fillimisht Spitali Amerikan ka tentuar ta mbajë të fshehur këtë skandal të madh, por qytetarë dhe pacientë kanë njoftuar mediat duke denoncuar këtë ngjarje të rëndë.
Pjesë e heshtjes është bërë edhe Policia e Shtetit, e cila shpesh herë nuk ngurron të raportojë sukseset e saj ndërsa në rastin në fjalë nuk dërgoi asnjë njoftim për gazetarët.
Ndërkohë Shërbimi Zjarrfikës raporton një tjetër version të ngjarjes. Sipas Shkëlqim Goxhaj dy pacientë janë konfliktuar brenda shërbimit të dializës. Ai shton se pacientët ka marrë benzinë për ta hedhur në drejtim të tjetrit dhe ka ndezur zjarrin. Në panik e sipër pacienti i ka vënë flakën vetes ndërsa pacienti tjetër ka marrë plagë djegieje.
Boldnews.al ka raportuar më herët për kushtet tepër skandaloze që ofron ky spital privat ndaj pacientëve që marrin shërbimin e dializës. Edhe pse përfiton milion euro nga buxheti i shtetit, Spitali Amerikan maksimizon fitimet duke i hequr kushtet mininale për një pacient.