Cyber_Spartacus
Homo Homini Lupus
Komunistët kanë kërkuar referendum kombëtar për rivlerësimin e figurës së diktatorit Enver Hoxha. Kjo kërkesë është bërë publike dje në veprimtaritë promovuese që janë organizuar me rastin e 100-vjetorit të lindjes së diktatorit komunist. Kryetari i Partisë Komuniste Shqiptare, Hysni Milloshi, ka deklaruar nga qyteti i Gjirokastrës se tashmë ka ardhur koha të organizohet një referendum kombëtar për të vlerësuar figurën dhe veprën e udhëheqësit të madh shqiptar, Enver Hoxha. Ky i fundit, sipas Milloshit, ka qenë i vetmi udhëheqës shqiptar që nuk ka bërë kompromise dhe pazare politike në kurriz të kauzës kombëtare, siç mund të bëhen nga politikanët e sotëm të shitur te Perëndimi. "Mjaft baltë është hedhur mbi udhëheqësin e shqiptarëve, por ata që kanë hedhur baltë më parë kanë filluar të reflektojnë, duke u gjunjëzuar te parimet e vërteta të mbrojtjes së atdheut, e cila është detyra e çdo shtetasi shqiptar, karshi rrezikut që i kanoset nga vendet armike të kombit", tha Milloshi. Ceremonitë festive për nder të figurës së ish-udhëheqësit komunist, kanë filluar qysh në orët e para të mëngjesit të djeshëm kur dhjetëra vetë të rinj e të vjetër, me flamuj të kuq dhe portrete të diktatorit janë grumbulluar na vendin ku Enver Hoxha zhvilloi mitingun e tij të fundit në qytetin e lindjes, në tetor të vitit 1978, në sheshin "اerçiz Topulli". Altoparlantët e mëdhenj të instaluar në kënde të sheshit përcillnin këngë të tilla si "Enver Hoxha tungjatjeta", "Ligjëro udhëheqësi ynë" etj. Pas fjalimeve përshëndetëse, grumbulli i simpatizantëve komunistë, i kryesuar nga Milloshi, ka vendosur buqeta me lule në vendin ku qëndronte dikur monumenti i Hoxhës i shkatërruar në korrik të vitit 1991. Më pas, kanë shkuar në shtëpinë e lindjes së Enver Hoxhës në lagjen "Palorto", ku janë mjaftuar ta vrojtojnë nga jashtë, sepse, siç thanë vetë komunistët, nuk është lejuar hyrja e tyre brenda në shtëpi nga ana e njërit prej djemve të Enver Hoxhës. Lideri i komunistëve shqiptarë, Hysni Milloshi, ka paralajmëruar organizimin e një superveprimtarie më datën 15 tetor në kryeqytet dhe për këtë rast, ai ka ftuar si pjesëmarrës VIP edhe kreun e Bashkisë së Gjirokastrës, Flamur Bime. Në prani të dhjetëra simpatizantëve të ardhur nga i gjithë vendi, lideri i PKSH-së ka shfrytëzuar rastin për t‘iu kundërpërgjigjur reagimit të prefektit të Qarkut të Gjirokastrës, Spiro Ksera, duke e cilësuar atë si një tradhtar të ideve komuniste. "Dua të deklaroj nga qyteti i vendlindjes së udhëheqësit tonë të madh, Enver Hoxha, se prefekti i Gjirokastrës, Spiro Ksera, ka frikë nga parullat e proletariatit, pasi ai është një tradhtar i ideve komuniste", ka deklaruar Milloshi, duke u shoqëruar nga brohoritjet e shumta pas çdo frazë të mbaruar nga ai. Në fund të veprimtarive të djeshme, simpatizantët e Enver Hoxhës kanë vizituar një ekspozitë fotografike të periudhave të ndryshme të diktatorit.
Gazeta Shqip
Gazeta Shqip
