TIRANE - "Ime shoqe më tradhtonte me fqinjin tonë. Kishte disa vite që e bënte këtë dhe unë nuk kisha rrugë tjetër. Kanuni i malësorit nuk më lejon ta pranoj një gjë të tillë, dhe e vetmja gjë që bëra sapo i kapa në flagrancë ishte plumbi ndaj të dyve". 70-vjeçari Halim Shehu, personi që vrau bashkëshorten e tij 67- vjeçare dhe fqinjin e tyre 70-vjeçar, Bexhet Xhabrahimi, u shpreh i penduar për krimin e kryer, ndërsa shpjegoi për rreth një orë para gjyqtares së gatshme të kësaj jave, ngjarjen e rëndë dhe arsyet pse e shtynë të bënte këtë gjë. Sipas 70-vjeçarit Halim Shehu, familja e tij ishte vendosur në Sauk rreth 10 vjet më parë, kur ishte shpërngulur për një jetë më të mirë nga fshati Zalldraç i Dibrës. Plaku Shehu tregoi më pas se bashkëshortja e tradhtonte me fqinjin e tyre, megjithëse këta kishin gjashtë fëmijë të rritur. I moshuari tha se ditën e ngjarjes kishte ftuar fqinjin e tyre në shtëpi për kafe dhe për ta parë nëse do të vazhdonte të shkonte me bashkëshorten e tij, pasi më parë ishin sqaruar dhe ai kishte vendosur të mos komunikonte me të. "Në një moment dola jashtë dhomës për nevoja personale, duke lënë bashkë fqinjin tonë dhe gruan. Dhe sapo dola, ai i hodhi dorën në qafë gruas time. Këtë fakt nuk munda ta duroj. Mora pistoletën dhe e ndoqa nga pas Bexhetin. Sapo ai u fut në oborrin e shtëpisë së tij e qëllova duke e lënë të vdekur. Pas kësaj shkova në shtëpi ku vrava edhe gruan time", pohoi plaku. Ndërsa më tej shpjegoi se me pistoletë në xhep ishte vetëdorëzuar në komisariatin nr.1 të policisë, ku dhe ka shpjeguar gjithë ngjarjen. Gjatë ditës së djeshme, 70-vjeçari ishte braktisur nga fëmijët në gjykatë. Fakti që në gjykatë nuk u paraqit asnjë mbrojtës i zgjedhur nga familja, detyroi gjykatësen e çështjes që t'i caktonte kryesisht avokatin Ergys Hysi. Prokurori që kishte drejtuar hetimet paraprake, pasi përshkroi ngjarjen në bazë të provave dhe vendit të ngjarjes, i kërkoi gjykatës deklarimin e arrestimit në flagrancë të të moshuarit dhe mbylljen e tij në qeli deri në përfundim të hetimeve. Të dyja kërkesat e prokurorit u kundërshtuan nga avokati Hysi, i cili pohoi se klienti i tij ishte vetëdorëzuar në polici madje kishte qenë i gatshëm edhe për të dhënë shpjegime, kërkonte vendosjen e një mase më të lehtë.
Redaktimi i fundit:
