Një 48-vjeçare nga Tirana është arrestuar për shkatërrim prone. Mimoza D., nënë e tre fëmijëve, ka shkatërruar me levë hekuri makinën e të shoqit, një “Benz ML”. Ngjarja ka ndodhur pasditen e së shtunës, në rrugën “Irfan Tomini”.
Siç shkruan sot “Panorama”, 48-vjeçarja i ka thyer të gjithë xhamat dhe i ka shpuar gomat e makinës së bashkëshortit, ndërsa ky i fundit flinte në shtëpi.
Pasi ka parë dëmin e shkaktuar dhe pa pasur asnjë dyshim për të shoqen, Lekë D. e ka denoncuar ngjarjen në komisariatin e policisë. Efektivët blu kanë nisur hetimet, duke pyetur fillimisht banorët e zonës dhe familjarët.
Në momentin që është pyetur, 48-vjeçarja Mimoza D. e ka pranuar atë që kishte bërë. Ajo është shprehur se kishte zënka shpesh me të shoqin për vonesat e kthimit në shtëpi dhe mungesën e dëshirës për të dhënë shpjegime për këtë.
Shekulli