Plisat: Maqedonia “shtet ‘fallc’”!
Pas reagimeve nga autoritetet maqedonase rreth djegies së flamurit të tyre në Prishtinë, grupi i tifozëve të FC Prishtinës, Plisat, kanë dalë me një komunikatë të publikuar në ueb faqen e tyre, fcplisat.com, nëpërmjet të cilës kanë marrë përgjegjësin e djegies së flamurit.
Nëpërmjet kësaj komunikate, Plisat kanë thënë se e kanë parë të arsyeshme ta ndërmarrin një hap të tillë, pasi institucionet e Kosovës i kanë mbajtur duart kryq pas botimit të enciklopedisë të shkruar nga maqedonasit, e cila i ofendon shqiptarët.
“Pas qëndrimit duarkryq të Qeverisë sonë në Kosovë dhe Akademisë së Shkencave të Kosovës, ne si pjesë e kësaj shoqërie dhe këtij kombi, kemi parë të arsyeshme që ta marrim një hap të tillë, për të reaguar ndaj provokimeve që po na bëhen neve si komb shqiptar, nga ky "shtet" fals!”, thuhet në komunikatën e Plisave.
Sipas Plisave, djegia e flamurit maqedonas është bërë pas dy veprimeve raciste ndaj kombit shqiptar që ngjanë kohëve të fundit.
“E para, sulmi i “tifozëve” të Vardarit muaj më parë ndaj popullatës së pafajshme shqiptare në lagjen "Nerez" të qytetit shqiptar Shkupit, dhe e dyta, “Enciklopedia e Maqedonisë” ku thuhet e pa vërteta dhe barbarizohet kombi shqiptar”, theksohet në këtë komunikatë.
“Krejt ky veprim i grupit të Plisave, është si reagim ndaj këtyre politikave raciste të këtij "shteti" artificial dhe gjithë aparatit të tij shtetëror. Kështu, ATA që po i provokojnë këto veprime, nuk mund t’i dënojnë ATA që reaguan ndaj tyre...”.
Madje, Plisat kanë thënë se ky është veprimi më i vogël që ata kanë mundur ta bëjnë. /express/