Kryetari i PBDNJ-së, Vangjel Dule, ka deklaruar se do të respektohet vendimi i strukturave të partisë
TIRANث - Partia e të Drejtave të Njeriut do të vazhdojë të jetë në koalicion me Partinë Socialiste, pavarësisht rezultatit, që do të certifikohet nga Komisioni Qendror i Zgjedhjeve. Pas deklaratës së Kryeministrit Sali Berisha, se do të shtrijë duart edhe tek partitë e majta, ka reaguar dje kryetari i PBDNJ-së, Vangjel Dule.
Ky i fundit, përmes një konference për shtyp, ka hedhur poshtë çdo mundësi për një bashkëpunim të mundshëm paselektoral të forcës politike që ai drejton, me koalicionin e djathtë.
Kryetari i PBDNJ-së, Vangjel Dule, ka sqaruar edhe njëherë se PBDNJ-ja do vazhdojë të qëndrojë në koalicionin e majtë, ashtu siç ishte vendosur edhe para zhvillimit të zgjedhjeve të 28 qershorit.
"Tipar dallues i PBDNJ-së është respektimi i vendimeve të marra nga organet drejtuese të saj. Ne do t'i qëndrojmë vendimit, që kemi marrë më parë sa i përket bashkëpunimit me koalicionin e majtë",- tha ai.
I pakënaqur me rezultatin që shënoi partia e drejtuar nga ai në këto zgjedhje, Dule shtoi se, kjo çështje do të jetë pjesë e shqyrtimit në një kongres të jashtëzakonshëm, por duke mos dhënë afat se kur.
Po dje, kryetari i PBDNJ-së shprehu pakënaqësi mbi mënyrën se si votat e kësaj force politike u administruan nga komisionerët e Partisë Socialiste gjatë numërimit në KZAZ. Sipas tij, këto të fundit nuk arritën të mbronin votat e PBDNJ-së.
"Komisionerët e Partisë Socialiste nuk arritën të mbronin votat e PBDNJ-së gjatë administrimit të tyre. Mbetet për t'u parë nëse kjo ndodhi nga pamundësia e tyre, apo nga mosdashja, por kjo do të jetë pjesë e një diskutimi të mëvonshëm me këtë parti",- tha Dule.
Kryetari i PBDNJ-së e konsideroi veprim tepër flagrant vendimin e qeverisë për të shpërblyer komisionerët e qendrave të votimit dhe numëruesit e votave nëpër KZAZ, kur ky proces nuk kishte mbaruar ende në të gjithë territorin e vendit.
Sipas tij, është KQZ-ja ajo që gëzon të drejtën e marrjes së një vendimi të tillë dhe jo Këshilli i Ministrave.
"Kreu i një force politike pjesëmarrëse në zgjedhje, premton se do t'i shpërbleje ata me paratë e taksapaguesve shqiptarë",- tha Dule, duke shtuar se partia e tij në këto zgjedhje, nuk kishte kundërshtar PD-në, por strukturat shtetërore të drejtuara nga kjo e fundit.
Kur ende nuk është qartësuar plotësisht rezultati përfundimtar i zgjedhjeve, Berisha ka paralajmëruar për një zgjerim të koalicionit, ditët në vijim, me forca të tjera politike.
Deri më tani, Berisha ka siguruar vetëm votën e deputetit të LSI-së, Dritan Prifti, i cili është shprehur publikisht se do të votonte një mazhorancë të udhëhequr nga Berisha.