Aplikimi për pasaportën biometrike nxjerr pasaportën e vjetër nga përdorimi
Erjon Ajazi
Vizat në pasaportat e vjetra pas datës 1 janar 2011 nuk do të jenë më të vlefshme. Lajmi është konfirmuar nga drejtori i përgjithshëm i Gjendjes Civile, Armand Teliti, i cili e shikon si mënyrën e vetme për t‘i dhënë zgjidhje kësaj situate kalimin e vizës së vjetër në pasaportën e re. Por qeveria shqiptare nuk ka një përgjigje sesa të disponueshme do të jenë ambasadat për të bërë kalimin e vizës nga pasaporta e vjetër në pasaportën e re. Teliti ka sqaruar se "në momentin e aplikimit të pasaportës së re biometrike, pasaporta e vjetër del nga sistemi dhe ato nuk konsiderohen më të vlefshme". Pra, nëse një qytetar disponon një vizë në pasaportën e vjetër, dhe nëse aplikon për dokumentin e ri biometrik, pasaporta e tij e vjetër konsiderohet e pavlefshme dhe si pasojë të njëjtin fat do të ketë edhe viza që ky qytetar disponon në këtë pasaportë. Janë vetëm ambasadat ato që kanë të drejtën për të dhënë ose jo të njëjtën vizë nga e para. Deri tani, e vetmja zgjidhje nga qeveria shqiptare është që viza e vjetër të fotokopjohet dhe t‘i bashkëngjitet pasaportës së re dhe si rrjedhim të dyja të dërgohen në ambasadë nga vetë personat e interesuar për të rimarrë vizën në pasaportën e re. Pra, zgjidhja ngelet vetëm në dorën e ambasadave sesa të gatshme do të tregohen ato për të përmbushur këtë mision të palës shqiptare. Pasaportat e vjetra dalin nga përdorimi më 1 janar 2011. Drejtori i përgjithshëm i Gjendjes Civile, Armand Teliti, bën me dije se "nëse Bashkimi Europian do të liberalizojë vizat, atëherë nga kjo gjë do të përfitojnë vetëm personat që janë të pajisur me pasaportat biometrike për të lëvizur të lirshëm në vendet e Bashkimit Europian". Qeveria vendosi të nxjerrë jashtë përdorimit funksionin e certifikatave, duke i zëvendësuar ato me kartat e identitetit, ndërsa pasaportat e kuqe e humbasin funksionin e tyre në janar të vitit 2011. "Qytetarët shqiptarë me skadimin e vizave të rinovojnë pasaportat dhe të marrin pasaportat e reja biometrike", thotë Teliti. Vlen të theksohet fakti që pasaportat biometrike janë kushti themelor për liberalizimin e vizave, ndërkohë që afati i fundit i vlefshmërisë së pasaportave të vjetra është deri në janar të vitit 2011. Pasaportat do të tërhiqen pranë komisariateve të policisë, për shkak të sigurisë që paraqet pasaporta. Gjithashtu, në momentin që do të tërheqin dokumentet, do të bëhet një verifikim i shenjës së gishtit të personit që tërheq dokumentin në rast se korrespondon me atë që ka aplikuar në fillim. Në rast se kjo nuk ndodh do të thotë se kemi një mospërputhje me shenjën e gishtit, ky dokument është i pavlefshëm megjithëse është i prodhuar, por i pavlefshëm për t‘u përdorur. Kjo bëhet për të garantuar në mënyrë definitive sigurinë. Pasaporta biometrike kushton gjashtëmijë lekë të reja.
Pasaporta shqiptare do të ketë ngjyrën e 27 vendeve të BE-së. Ishte parashikuar të kishte një ngjyrë tjetër, por sipas direktivës së BE që të gjitha pasaportat e vendeve anëtare të BE-së të kenë ngjyrën bordo, atëherë u vendos që pasaporta e shqiptarëve të mos ketë asnjë ndryshim nga pasaporta e vendeve europiane.
Shifrat
Teliti: 80 mijë aplikime për pasaportat e reja
Brenda 24 orëve, 2200 kërkesa për biometriket
Ministria e Brendshme dhe Drejtoria e Përgjithshme e Gjendjes Civile bëjnë me dije se deri tani numri i qytetarëve të cilët kanë aplikuar për pasaportat biometrike ka shkuar në 80 mijë. Drejtori i DPGJC-së, Armand Teliti, konfirmon se në muajin korrik numri i aplikimeve për pasaportat e reja shkon në 2200 në një ditë. Ndërkohë, institucionet shqiptare kanë filluar të mos njohin pasaportat e vjetra. Një dëshmi penaliteti merret me kopjen e kartës së identitetit ose të pasaportës së re biometrike dhe jo me pasaportën e vjetër. Te pasaportat biometrike në brendësi të saj ka një fotografi dixhitale që është e gdhendur në lazerin ingrey. Faqet e vizave kanë elemente të tjera sigurie, kanë shënime që lexohen nëpërmjet rrezeve ultravioletë, kanë gjithashtu uotermarkun që është një portret i Skënderbeut që është i vizatuar në brendësi të shqiponjës. Ka një shirit sigurie në çdo fletë që është shënuar në mikrotekst Republika e Shqipërisë me dy ngjyra. Një ndër elementet e tjera është kinograma, e cila është stilizuar një shqiponjë që po ta shikosh në kënde të ndryshme ka një valëzim të krahëve në krahun e majtë dhe në sfondin e këtij fluturimi të shqiponjës ne kemi siluetat reale të tre maleve të Shqipërisë të Korabit, Tomorit dhe Dajtit që janë të inkuadruar në këtë element tjetër sigurie të rëndësishëm.
