< KUKثS- Vetëm pak kohë pas përfundimit, çarje, dëmtime dhe rrëshqitje në segmentin Kukës-Morinë, pjesë e autostradës Durrës-Morinë.
Gjithandej kësaj rruge, që cilësohet dhe e standardeve të larta në ndërtim, shihen dëmtime serioze në tabanin e saj, por dhe në anësore dhe pjesët e tjera përbërëse. Në shumë vende të këtij aksi rrugor vërehen shembje të tokës, çarje të asfaltit dhe cedime të tabanit, duke e deformuar rrugën në shumë pjesë të tij.
Në jo pak vende çarjet e asfaltit dhe dëmtimet e thella, po kthehen në burim rreziku për automjetet e shumta që kalojnë përgjatë këtij aksi. Sinjalet e para të këtij dëmtimi u dhanë në afërsi të repartit ushtarak të Kukësit, ku më se 60 metra linear rezulton të ketë pësuar çarje asfalti për shkak të lëvizjes së tokës dhe cedimit të plotë të bazamentit.
Një lëvizje e tillë e tokës ka bërë që të shkaktohen probleme dhe në veprat e artit, kryesisht mure mbajtëse dhe mure anësore, ndërsa gurët e skarpateve të pasiguruara sipas parametrave të përcaktuara për rrugë të tilla janë "mysafirë të paftuar" të automjeteve që befas gjenden para tyre të kërcënuara nga rreziku që ato sjellin nga rënia e lartë.
Po ashtu dëmtime serioze vërehen edhe ne afërsi të fshatit Morinë vetëm tre kilometra larg doganës ku janë dëmtuar afro 20 metra bankinë, që kanë pësuar rrëshqitje.
Specialistët janë shprehur se e gjitha kjo mos qendrueshmëri në disa vende të këtij aksi ka ardhur për shkak të mostabilizimit të bazamentit të rrugës, ndërsa ende askush nuk po merret me zgjidhjen e këtij problemi.
Me sa duket edhe për këtë aks rrugor nuk ka pasur një studim të mirfilltë gjeologjik, ose nuk është zbatuar projekti si duhet, pasi nëse kryhen gjithë punimet sipas parametrave të duhur duke ndërhyrë deri në thellësi të tabanit, nuk ka përse të ngjasin rrëshqitje të tilla.
