Shkrimtari dhe publicisti shqiptar, Faruk Myrtaj përfshihet në një skandal të rëndë pedofilie në qytetin kanadez, Toronto. Sipas “Toronto Sun”, Myrtaj është arrestuar të hënën me akuzën e tentativës së përdhunimit dhe ngacmim seksual ndaj një vajze 10-vjeçare. Ndërsa në datën 22 shtator, Myrtaj është përballur edhe me një gjykatë të Torontos në lidhje me vlerësimin e masës së sigurisë për akuzën e rëndë.
Lajmi ka bërë xhiron e të përditshmeve dhe agjencive kanadeze duke tronditur mbarë opinionin vendas, përfshi këtu edhe komunitetin shqiptar që në Toronto llogaritet në 28 mijë. 54-vjeçari Myrtaj, i emigruar prej 6 vjetësh në Kanada, mësohet se është anëtar i Unionit të Shkrimtarëve në këtë vend.
“Toronto Sun” citonte burimet policore lokale të Torontos: “Një vajzë 10-vjeçare luftoi me “dhëmbë dhe thonj” për t’i shpëtuar një agresori, i cili tentoi të abuzonte seksualisht me të”. Ndërsa vijon se “policia ka akuzuar administratorin e një pallati për abuzim seksual, shfrytëzim seksual, ftese për prekje seksuale, përdorim seksual dhe marrje me dhunë”.
Një polic citohet të ketë thënë se viktima ishte vetëm në një dhomë lavanterie të pallatit paraditen e së njëjtës ditë, kur pretendohet se ishte marrë në një kafaz shkallësh të pallatit. Shkrimtari dhe gazetari Faruk Myrtaj ka publikuar 6 vëllime me tregime të shkurtra, një roman dhe një seri esesh dhe poemash.
Në Shqipëri ai ka shkruar për një sërë gazetash vendase, kosovare dhe maqedonase. Gjatë karrierës së tij ka pasur postet e zv/drejtorit të Agjencisë Shqiptare të Lajmeve (ATSH), si dhe detyra në Ministrinë e Kulturës, Rinisë dhe Sporteve.
*Balkanweb*
