Zbulohen emrat, ja kush do jenë ministrat e qeverisë së re
Ministritë që i takojnë LSI-së, PR-së dhe ndryshimet e tjera në kabinet: Sali Berisha kryeministër, Lulzim Basha zëvëndës i tij, Jozefina Topalli ministre e Jashtme dhe Ilir Meta kryetar i Kuvendit. Katër ministritë që do të marrë LSI-ja dhe kush do të jenë ministrat e rinj të PD-së dhe ata që largohen. Zbulohet qeveria PD-LSI ideuar ditët e fundit.Qeveri me bazë të gjerë! Kjo do të jetë pikënisja e kreut demokrat, e cila do të hedhë “themelet” e kabinetit që do të qeverisë edhe për katër vitet e ardhshme. Surprizë në themelimin e kësaj qeverie është përfshirja e një force të majtë në të, si LSI-ja, së cilës do t’i takojë një numër i konsiderueshëm i portofolash ministrorë. Po kështu qeveria do të ketë në përbërjen e saj edhe Partinë Republikane, e cila ka qenë në kabinet edhe mandatin e shkuar. Por ajo që të bie në sy është një gërshetim i figurave që kanë qenë ekzistentë në qeverisje me figura të reja dhe të zgjedhura për herë të parë nga populli. Nga burime brenda selisë blu dhe nga fjalët që qarkullojnë në korridoret e selive, gazeta “Tirana Observer” ka mundur të zbulojë emrat e ministrave që do të formojnë qeverinë “Berisha”. Ndërsa kreu demokrat ka bërë të ditur se emrat zyrtarë do të bëhen publikë në 10-ditëshin e fundit të muajit gusht.
Kabineti
“Komandanti” i kabinetit të ri ekzekutiv do të jetë kreu i PD-së, Sali Berisha. Dhe mësohet që zëvendëskryeministër do të bëhet ish-ministri i Jashtëm, Lulzim Basha. Ndërkohë që katër portofola ministrorë t’ marrë Lëvizja Socialiste për Integrim, e cila do të qeverisë bashkë me Partinë Demokratike. Kështu, në krye të Ministrisë së Integrimit pritet të jetë përfaqësuesi i LSI-së, Edmond Haxhinasto; ministër i Shëndetësisë, Petrit Vasili; ministër i Energjetikës, Dritan Prifti; dhe në krye të Ministrisë së Brendshme do të vihet Sokol Dervishaj. Ndërkaq, që ish-kryetarja e Kuvendit, Jozefina Topalli, do të udhëheqë Ministrinë e Jashtme, pasi në vendin e saj do të jetë kreu i LSI-së, Ilir Meta. Tek Ministria e Financave, Ekonomisë, Bujqësisë dhe Transporteve nuk do të ketë ndryshime, në krye të tyre do të jenë të njëjtët ministra që janë në qeverinë aktuale.Ndryshimet
Duket se kabineti i ri qeveritar do të ketë shumë ndryshime si në përbërje ashtu edhe në format. Kështu, disa ministri janë ndarë për të formuar dy ministri të ndryshme. Ministria e Turizmit, Kulturës, Rinisë dhe Sporteve është ndarë në Ministrinë e Kulturës, Rinisë dhe Sporteve me në krye Majlinda Bregun, si edhe në Ministrinë e Turizmit me në krye Albana Vokshin. Gjithashtu edhe Ministria e Ekonomisë, Tregtisë dhe Energjetikës do të ndahet në Ministrinë e Ekonomisë me në krye Genc Rulin dhe në Ministrinë e Energjetikës të kryesuar nga Dritan Prifti. Në krye të Ministrisë së Mbrojtjes pritet të jetë Genc Pollo, i cili do të zërë vendin Gazmend Oketës dhe në Ministria e Arsimit pritet t’i jepet Myqerem Tafajt, një nga këshilltarët e Berishës për arsimin. Ministër i Punës dhe i Shanseve të Barabarta pritet të jetë Spiro Ksera dhe ministër Mjedisi, Fatmir Mediu. Ndërkohë që Ilir Rusmali do t’i rikthehet sërish Ministrisë së Drejtësisë.Sali Berisha
Ashtu sikurse askush nuk e mendon dot ndryshe, Sali Berisha do të jetë sërish udhëheqësi i “ushtrisë” së tij qeveritare. Ashtu sikurse e ka deklaruar dhe vetë, Berisha nuk do të heqë dorë nga politika vetëm kur “ta thërrasë Zoti”. Jo vetëm që nuk është i lodhur, por, për më tepër fitorja i ka dhënë plot energji të reja për të qenë në krye të ekzekutivit.
Lulzim Basha
Ministër i Transporteve, më pas ministër i Jashtëm e tashmë do ta shohim në një këndvështrim të ri, zëvendëskryeministër. E kush më mirë se Lulzim Basha mund të ishte zëvendësuesi i kryeministrit Berisha? Ky është një post që do të afrojë edhe më tej marrëdhënien dhe bashkëpunimin midis tyre.
Jozefina Topalli
Jemi mësuar ta shohim gjithnjë në krye të Parlamentit Shqiptar. Jemi mësuar ta shohim si “komandanten” e 140 ligjvënësve. Por tashmë duket se posti i saj do të ndryshojë. Ajo do të vihet në krye të Ministrisë së Jashtme, ndërsa mësohet se në postin e kryetarit të Kuvendit do të jetë kreu i LSI-së, Ilir Meta.
Petrit Vasili
Një ish-zëvendësministri i Shëndetësisë do t’i shkonte shumë përshtat portofoli i ministrit të saj. Petrit Vasli, sekretar i Përgjithshëm i Lëvizjes Socialiste për Integrim, pritet të kryesojë një nga ministritë më të rëndësishme në vend, e cila kërkon një reformim të gjithanshëm.
Sokol Dervishaj
Edhe një tjetër ministri e rëndësishme, si Ministria e Brendshme, pritet të kryesohet nga përfaqësues të Lëvizjes Socialiste për Integrim. Sokol Dervishaj, aktualisht kryetar i Këshillit Bashkiak, në Bashkinë e Tiranës, pritët të bëhet ministër i Brendshëm.
Genc Pollo
Nga ministër i Arsimit, pas reformimit të qeverisë “Berisha” u bë zëvendëskryeministër. Tashmë do të mësohemi ta shohim në krye të Ministrisë së Mbrojtjes, e cila aktualisht i takon Gazmend Oketës. Pollo ka kryesuar listën e kandidatëve për deputetë në qarkun e Beratit, ku Partia Demokratike ka fituar 3 mandate.
Edmond Haxhinasto
Integrimi ka qenë një ndër pikat më të klikuara të Lëvizjes Socialiste për Integrim. Dhe kush më mirë se LSI do ta udhëhiqte dikasterin e Integrimit. Kështu, në krye të Ministrisë së Integrimit, që aktualisht i takon Majlinda Bregut, do të vihet përfaqësuesi i LSI-së, Edmond Haxhinasto.
Ridvan Bode
Për katër vite me radhë e kemi parë në krye të Ministrisë së Financave. Ndërkohë që dhe për katër vitet e ardhshme do të jetë sërish në krye të kësaj ministrie. Ridvan Bode është një nga ministrat më të qëndrueshëm dhe korrektë të kabinetit qeveritar “Berisha”, i cili nuk do t’i lërë me kaq angazhimet dhe reformat në fushën financiare.
Genc Ruli
Genc Ruli ka drejtuar për katër vite Ministrinë e Ekonomisë, Tregtisë dhe Energjetikës dhe ndërkaq në katër vitet e ardhshme pritet të jetë vetëm në krye të Ministrisë së Ekonomisë, pasi Ministria e Energjetikës do të jetë një portofol ministror më vete dhe do të drejtohet nga një tjetër ministër.
Dritan Prifti
Dikasteri i Energjetikës, që aktualisht është e bashkëngjitur me Ministrinë e Ekonomisë, do të jetë ministri më vetë, e cila do të drejtohet nga deputeti i Lëvizjes Socialiste për Integrim, Dritan Prifti. Ndërkohë që Prifti ka drejtuar Ministrinë e Energjetikës në kohën kur në krye të ekzekutivit ka qenë Ilir Meta.
Ilir Rusmali
Deputeti i Partisë Demokratike, Ilir Rusmali, ka qenë përreth dy vjet në krye të Ministrisë së Drejtësisë. Pasi dha dorëheqjen nga ky post, duket se Rusmalit do t’i besohet sërish drejtimi i Ministrisë së Drejtësisë për katër vitet e ardhshme. Rusmali është njohës i mirë i ligjeve dhe funksionimit të kësaj ministrie.
Sokol Olldashi
Nga Ministria e Brendshme kaloi në Ministrinë e Transporteve. Duket qartë, se Olldashit i përshtatet më së miri ky portofol ministror, pasi mësohet se edhe në kabinetin e ri qeveritar do të drejtojë Ministrinë e Transporteve.
Myqerem Tafaj
Myqerem Tafaj, një nga këshilltarët më të besuar dhe më të vjetër të kryeministrit Sali Berisha për arsimin, tashmë do të jetë në krye të Ministrisë së Arsimit. Kjo është fusha për të cilën ai ka këshilluar për vite me radhë kryeministrin Berisha.
Jemin Gjana
Ministria e Bujqësisë nuk do të ketë asnjë ndryshim për sa i përket drejtimit të saj. Për katër vite ky dikaster është drejtuar nga ministri Jemin Gjana, ndërkohë që mësohet se edhe për këtë mandat katërvjeçar, kjo ministri do t’i besohet sërish Jemin Gjanës.
Majlinda Bregu
Pas ish-ministres Arenca Trashani, Ministria e Integrimit është përfaqësuar nga Majlinda Bregu, e cila përveç portofolit ministror, është zëdhënëse e qeverisë, si edhe ka qenë zëdhënëse e fushatës elektorale të PD-së. Tashmë Bregu pritet të jetë në krye të Ministrisë së Kulturës, e cila aktualisht drejtohet nga ministri Ardian Turku.
Albana Vokshi
Albana Vokshi është një ndër personat më të besuar të kryeministrit Berisha, këshilltare dhe shefe kabineti. Vokshi do të marrë drejtimin e Ministrisë së Turizmit, e cila do të jetë ë ndarë nga dikasteri i Kulturës, Rinisë dhe Sporteve.
Spiro Ksera
Ministria e Punës, اështjeve Sociale dhe Shanseve të Barabarta tashmë do të drejtohet nga Spiro Ksera. Më parë kjo ministri ka qenë e drejtuar nga Kosta Barka, i cili u detyrua të japë dorëheqjen dhe aktualisht drejtohet nga ministri Viktor Gumi. Ksera ka qenë prefekt në qarkun e Gjirokastrës.
Fatmir Mediu
Ish-ministri i Mbrojtjes, Fatmir Mediu, pas dorëheqjes nga ky dikaster, tashmë do të vendoset në krye të Ministrisë së Mjedisit, e cila aktualisht drejtohet nga ministri Lufter Xhuveli. Megjithëse Mediu është vënë nën hetim nga prokuroria, si duket sërish do të jetë në përbërje të qeverisë së re.
Kryeministër - Sali Berisha
Zëvendëskryeministër - Lulzim Basha
Ministre e Jashtme - Jozefina Topalli
Ministër i Shëndetësisë - Petrit Vasili
Ministër i Brendshëm - Sokol Dervishaj
Ministër i Mbrojtjes - Genc Pollo
Ministër i Integrimit - Edmond Haxhinasto
Ministër i Financave - Ridvan Bode
Ministër i Ekonomisë - Genc Ruli
Ministër i Energjetikës - Dritan Prifti
Ministër i Drejtësisë - Ilir Rusmali
Ministër i Transporteve - Sokol Olldashi
Ministër i Arsimit - Myqerem Tafaj
Ministër i Bujqësisë - Jemin Gjana
Ministre e Kulturës - Majlinda Bregu
Ministre e Turizmit - Albana Vokshi
Ministër i Punëve dhe Shanseve të Barabarta - Spiro Ksera
Ministër i Mjedisit - Fatmir Mediu
Tiranaobserver
Redaktimi i fundit: