VLORث- Policia e Vlorës bllokoi një mjet lundrues, të braktisur në ujërat detare, në bordin e të cilit ndodheshin 300 kg lëndë narkotike të llojit kanabis sativa.
Burime zyrtare nga policia e qytetit bregdetar bënë të ditur të mërkurën se mjeti lundrues, skaf, u bllokua në ujërat detare, në afërsi të fshatit Dhërmi, 50 km në jug të Vlorës, teksa lëvizte nga ujërat territoriale greke, në drejtim të bregdetit shqiptar.
"Ditën e djeshme rreth orëve të paradites nga Stacioni i Policisë Himarë është konstatur një mjet lundrues tip skaf i cili po lëvizte nga ujërat territoriale Greke (Ishujt e Fanit ) me drejtim për në ujërat territotiale shqiptare (Dhërmi). Mjeti është mbikëqyrrur për disa orë me radhë nga shërbimet e policisë derisa rrymat e forta ujore, pasi lëvizshmëria e detit ishte 8 ballë, e kanë futur në territorin Shqiptar. Më pas Shërbimet e Drejtorisë Rajonale për Kufirin & Migracionin Vlorë dhe Drejtorisë së Policisë Qarku Vlorë kanë arritur që ta nxjerrin në breg ku kanë konstatuar se ishte një Skaf me mbishkrime dhe matrikullime Italiane", thuhet në njoftimin e policisë.
Gjithashtu brenda këtij mjeti shërbimet e policisë kanë gjetur edhe disa canta të mbushura me lëndë narkotike te llojit “cannabis sativa” e cila pas peshimit rezultoi të ishte rreth 300 kg.
Nga hetimet e deritanishme rezulton se Skafi ka ardhur nga territori Italian në territorin Grek (Ishujt e Fanit) dhe për shkak të detit të trazuar dhe rrymave të forta detare është braktisur nga trafikantët dhe ka dalë në ujërat tona territoriale.
Drejtoria Rajonale për Kufirin & Migracionin Vlorë dhe Drejtoria e Policisë Qarku Vlorë ashtu si edhe në të gjitha rastet e tjera po bashkëpunojnë me organet ligjzbatuese për hetimin e rastit dhe identifikimin e arrestimin e autorëve.
Sipas Policisë, skafi mendohet të ketë si pikënisje bregdetin e Italisë, me drejtim ishujt grekë të Fanit, por, për shkak të detit të trazuar me dallgë, deri në 8 ballë dhe rrymave të forta detare, të jetë braktisur nga trafikantët.
(m.a/BalkanWeb)
