Një autobus me 31 pasagjerë, përfaqësues të Kishës Ortodokse, që udhëtonte nga Vlora në drejtim të Krujës është përfshirë nga flakët.
Ngjarja ndodhi përballë qendrës shëndetësore të qytetit të Krujës, teksa autobusi ishte në ecje.
Sipas policisë së Durrësit një grua ka humbur jetën, ndërsa dyshohet për të paktën 12 të lënduar, 5 prej të cilëve në gjendje të rëndë shëndetësore. Ata janë nisur drejt Qendrës Spitalore Universitare Nënë Tereza për të marrë trajtim më të specializuar.
Në vendin e ngjarjes ndodhen ambulanca dhe zjarrëfikëset.
Paraprakisht dyshohet se shkak i zjarrit ka qenë një shkëndijë elektrike në pjesën e pasme të motorit.
Autobusi me targa AA 584 MP i tipit Benz Mercedes, drejtohej nga shtetasi me iniciale S.J.
Mësohet se nga flakët i dëmtuar ka mbetur dhe një furgon tip ford me targë KR 4776A./tvklan.al