T’u mësosh MIRËNJOHJEN fëmijëve

Mësimi i mirënjohjes për fëmijët është një detyrë e ngadaltë. Bëhet fjalë për shoqërimin e zhvillimit të tyre biologjik, në mënyrë që ata të shijojnë këtë virtyt të mrekullueshëm.

Mësimi i mirënjohjes tek fëmijët shkon përtej zakonit të thjeshtë të të përgjigjurit thjesht me një “faleminderit”. T’u rrënjosësh atyre një ndjenjë mirënjohjeje është shumë e ndryshme. Nuk flasim vetëm për sjellje të mira, mirënjohja është një mentalitet, një tipar personaliteti dhe një mënyrë jetese.

Prandaj, mirënjohja është një vlerë që çdo fëmijë duhet ta zhvillojë që të jetë në gjendje të kuptojë se çfarë bëjnë të tjerët për të. Të qenit mirënjohës është një karakteristikë e rëndësishme personale së bashku me prirjet e tjera, si bujaria dhe mirësia. Një fëmijë mirënjohës është më pak egoist. Prandaj, mësimi i mirënjohjes tek fëmijët është jashtëzakonisht i rëndësishëm, sepse do t’i bëjë më të lumtur.

---

“Mirënjohja na e bën atë që kemi të bollshme. Është shenjë e shpirtrave fisnikë”.
– Ezopi –

---

Si t’ua mësojmë mirënjohjen fëmijëve?
Qindra studime pajtohen se, midis shumë përfitimeve, praktikimi i mirënjohjes shtyn drejt emocioneve pozitive. Redukton rrezikun e depresionit;
Nxit marrëdhënie të përmbushura;
Rrit aftësinë për të rimarrë veten përballë ngjarjeve stresuese të jetës.
Nuk ka dyshim se mësimi i fëmijëve për të qenë mirënjohës është një dhuratë e madhe për ta dhe për njerëzit përreth tyre. Ja disa strategji të dobishme.
1. Mësojini fëmijëve mirënjohjen duke dhënë një shembull të mirë
Prindërit dhe figurat e tjera referuese të të rriturve janë modeli i parë për fëmijët. Nëse i shohin prindërit e tyre që sillen me bujari, argëtohen dhe vlerësojnë gjërat e mira që u ndodhin, sado të vegjël që të jenë, ata do të priren të ndjekin shembullin e tyre. Nëse, përkundrazi, fëmijët shohin se prindërit dhe të rriturit e tjerë ankohen gjithmonë për gjithçka, sillen në mënyrë të vrazhdë dhe nuk kënaqen kurrë me asgjë, do ta kenë shumë të vështirë të kuptojnë se çfarë do të thotë të jesh dhe të ndihensh mirënjohës.
2. Ndihmojini të kuptojnë se edhe të tjerët kanë nevoja të caktuara
Është e natyrshme që fëmijët të jenë egoistë dhe është e vështirë t’i bësh të kuptojnë se bota është e gjerë dhe nuk sillet rreth dëshirave të tyre. Biologjikisht, aftësia për të dalë nga universi i tyre do të fitohet me kalimin e kohës; megjithatë ne mund t’i ndihmojmë duke u nisur nga mjedisi familjar. Duhet t’i ndihmojmë të kuptojnë se ne të gjithë kemi dëshira dhe se, shpesh, ato janë në një farë kuptimi të kundërta ose jo shumë të pajtueshme me ato të të tjerëve. Pamundësia për t’i kënaqur ato mund të shkaktojë zhgënjim, duke zhvendosur vëmendjen nga ajo që kemi, drejt krijimit të një bote të krijuar nga ajo që na mungon.
3. Mësojini fëmijëve mirënjohjen me vlerën e ndarjes
Një fëmijë që mëson të ndajë me të tjerët, gjithashtu kupton se si të vlerësojë atë që ka, dhe kjo ka të bëjë me objektet, komoditetet dhe njerëzit ku duhet të mbështetet. Ndarja kërkon të mësosh të jesh i respektueshëm ndaj të tjerëve dhe të zgjerosh horizontet e botës.
4. Theksoni rëndësinë e të thënit “faleminderit”
Në misionin tonë për t’ua mësuar mirënjohjen fëmijëve, duhet të theksojmë një koncept: falënderimi nuk duhet të bëhet diçka mekanike, të cilën fëmijët mësojnë ta thonë kur marrin diçka; megjithëse në fillim është vetëm një fjalë për ta, ata duhet të mësojnë kuptimin e saj të vërtetë. Zakoni për të thënë faleminderit gradualisht do t’i ndihmojë të pyesin veten mbi arsyen e vërtetë pse ndihen mirënjohës.
5. Falënderojini kur bëjnë diçka të mirë
Kur fëmijët bëjnë diçka të mirë, duhet t’i falënderojmë. Të tregojmë mirënjohje ndaj tyre është thelbësore, pasi ne duam që ata të bëjnë të njëjtën gjë. Është pjesë e shembullit që duhet të përpiqemi ta japim. Në këtë mënyrë, fëmijët do të zbulojnë se janë të rëndësishëm dhe se ka gjëra të thjeshta që kënaqin të tjerët dhe i bëjnë të lumtur. Në të njëjtën kohë, ata gjithashtu do të duan t’i zbulojnë këto gjëra tek të tjerët.
6. Flisni për gjërat për të cilat jeni mirënjohës
Është e drejtë t’i kërkoni fëmijës të shprehë pse ndihet mirënjohës, pa e qortuar se nuk vlerëson diçka. Në këtë mënyrë mund të njihet më mirë dhe të zbulohen anë të karakterit të tij që duhen forcuar, për të konsoliduar konceptin e mirënjohjes. Të rriturit gjithashtu duhet t’u shpjegojnë fëmijëve pse ndihen mirënjohës. Në këtë mënyrë, ata mund të zgjerojnë pikëpamjen e tyre për botën dhe të përfshihen në një dialog që i ndihmon të vlerësojnë gjërat e mira që ndodhin në jetën e tyre.
Rëndësia e të qenit mirënjohës
Problemi është se mirënjohja nuk lind gjithmonë natyrshëm. Aspektet negative të jetës, si zhgënjimet, pakënaqësitë dhe frika, ndonjëherë na marrin më shumë vëmendjen sesa aspektet pozitive, duke na bërë që të mos pranojmë mirënjohjen si një tipar dallues të personalitetit. Robert Emmons, një ekspert akademik për mirënjohjen, argumenton se zhvillimi i qëllimshëm i një perspektive mirënjohëse ju lejon të jeni më të kënaqur me jetën.
Në angazhimin tonë për t’u mësuar fëmijëve mirënjohje, do të na duhet t’u theksojmë se shumë nga gjërat e mira që na ndodhin janë “dhurata” që kemi pasur fatin t’i marrim. Duke e bërë shprehi mirënjohjen, ne do të jemi në gjendje të ndryshojmë tonin emocional të jetës sonë dhe të krijojmë më shumë hapësirë për gëzim dhe lidhje me të tjerët.
/ bota.al