Dy ushtarët shqiptarë u qëlluan në Afganistan rreth orës 15:00. U qëlluan nga policia lokale, siç po ndodh jo pak herë në Afganistan. Njëri u konfirmua i vdekur. Kryeministri Sali Berisha do ketë qenë ndër të parët që mori lajmin. Por edhe pse e dinte për këtë lajm të rëndë, ai u shfaq në krah të të rinjve demokratë për të shpenzuar miliona lekë në një koncert propagandë për rënien e komunizmit. Deri vonë ai as nuk denjoi të reagonte për këtë ngjarje të rëndë. Në vend të kësaj dëgjonte اiljetën e Gretën duke kënduar para adoleshentëve me paratë e paguara nga xhepat e taksapaguesve shqiptarë.
Ndërkohë, nëpërmjet një mesazhi të bërë publik sot pasdite, Presidenti i Republikës, Bamir Topi dhe njëkohësisht Komandanti i Forcave të Armatosura të Shqipërisë shprehu ngushëllimet për familjarët e paqeruajtësit shqiptar, Kapitenit Feti Vogli, i cili humbi jetën tragjikisht në Kandahar, Afganistan.
‘’Të nderuar familjarë të Kapiten Feti Voglit,
Me keqardhje të madhe dhe pikëllim të thellë, mësova lajmin e hidhur të rënies heroikisht në krye të detyrës të Kapitenit Vogli si dhe për plagosjen e Nëntetarit Peçi, që të dy ushtarakë shqiptarë të kontigjentit ‘’Eagle 4’’ në kuadër të misionit paqeruajtës të NATO-s në Kandahar, në Afganistan. Në këto momente të rënda e tragjike, më lejoni t’ju shpreh në emër të mbarë shtetit shqiptar ngushëllimet më të ndiera për ndarjen nga jeta të njeriut tuaj të shtrenjtë e të pazëvendësueshëm! Më lejoni që si President i Republikës si dhe Komandant i Përgjithshëm, të jem pranë jush për të ndarë këtë dhimbje të madhe dhe për t’ju shprehur konsideratën më të lartë personale e institucionale për jetën dhe sakrificën sublime të këtij heroi të Forcave tona të Armatosura!
Në zemrat dhe kujtesën tonë të përbashkët kombëtare Kapiten Vogli do të mbesë përjetësisht i paharruar për veprën e tij heroike, për vetëmohimin dhe heroizmin e treguar në shërbim dhe në mbrojtje të vlerave të lirisë e demokracisë në botë, në luftën pakompromis kundër terrorizmit ndërkombëtar krah për krah me partnerët tanë të Aleancës më të madhe të paqes e sigurisë në botë. Me këtë rast, duke dënuar këtë akt të rëndë terrorist e duke kërkuar me vendosmëri ndëshkimin e autorëve, dëshiroj gjithashtu të vlerësoj lart kontributin heroik të të gjithë ushtarakëve shqiptarë, të cilët shërbejnë me misione paqeruajtëse anembanë globit si dhe të inkurajoj e të përgëzoj mbarë Forcat e Armatosura shqiptare për përmbushjen e misionit të tyre të guximshëm e vetëmohues! I përjetshëm qoftë kujtimi i tij!’’ – theksohet në mesazhin e Presidentit Topi.
Burimi:TemA
