LeVoyageur
Once upon a time...
Vlorë, 17 gusht 2016, NOA.al - Minuta të frikshme në Vlorë teksa një person u sulej njerëzve të pafajshëm në rrugët e qytetit dhe i dhunonte e disa prej tyre tentoi t’i marrë peng duke i rrëmbyer me mjetin e tij, nën thirrjet “Allahu Akbar” (Zoti është i Madh), etj. Ngjarja ka ndodhur në vende të ndryshme të qytetit të Vlorës brenda një harku kohor prej 2 orësh, raporton noa.al duke cituar burime në vendngjarje dhe konfirmimin që i dha sot, Drejtoria e Antiterrorit në Policinë e Shtetit. Autor i dyshuar i ngjarjes që terrorizoi Vlorën, banorët e saj dhe shumë pushues e turistë, është Dijar Xhema, 29 vjeç, lindur e banues në Mitrovicë, Kosovë. Për motive ende të paqarta, Dijari ka dhunuar fizikisht, psikologjikisht dhe ka tentuar të mbajë peng duke rrëmbyer me mjetin e tij 'Audi' me targa KS02300CO, tre shtetas me inicialet: B.N, N.I, dhe F. D. Këto veprime, Dijari i ka shoqëruar me thirrjet në vende dhe ambiente publike si“Allahu Akbar”, “Jam i dërguari i Allahut”, dhe “Do t’ju vras të gjithëve”. “Nisur nga veprimet e kryera, informacionet e dhëna nga qytetarë dhe reagimi në kohë rekord i strukturave të policisë u lokalizua dhe u neutralizua autori i dyshuar i këtyre akteve duke bërë kështu parandalimin e disa ngjarjeve të rënda kriminale me pasoja dhe impakt në publik”, - tha zyrtarisht Policia e Vlorës. Ajo detajoi se kapja dhe arrestimi i terroristit të dyshuar u bë në qytetin e Vlorës nga strukturat e Drejtorisë së Antiterrorit në bashkëpunim me policinë lokale. Dijar Xhema nuk e ka ndalur klimën e pasigurisë që mbolli në qytet sepse si gjatë arrestimit dhe në ambientet e shoqërimit ka kundërshtuar me dhunë punonjësit e policisë. Policia tha se gjatë kontrollit në automjetin e tij u gjet një sasi lënde narkotike e dyshuar si Cannabis Sattiva. Zyrtarisht autoritetet nuk kanë informacion që Dijar Xhema të vuajë nga ndonjë sëmundje mendore. Në këto rrethana, policia thotë se për të riun nga Mitrovica, Dijar Xhema ka dyshime të bazuara dhe arsyeshme, se me veprimet e tij ka konsumuar elementët e veprave penale: “Vepra me qëllime terroriste”; “Nxitja, thirrja publike dhe propaganda për kryerjen e veprave me qëllime terroriste”; “Nxitja e urrejtjes ose grindjeve”, (të mbetura në tentativë); “Prodhim dhe shitje narkotikeve”. Sakaq, burime zyrtare nga Policia e Kosovës i thanë agjencisë NOA.al se “ky person paraqet rrezikshmëri të theksuar shoqërore pasi në Kosovë është i evidentuar si person me precedent kriminal për tendencën e vrasjes, rrëmbim, dhunim personi, dhunim i punonjësve të organeve ligjzbatuese, mbajtje dhe përdorim pa leje të armëve të zjarrit”. Pas prangosjes, i riu gjendet në paraburgim dhe do të hetohet nga një ekip special i Prokurorisë për Krimet e Rënda e cila mësohet se do të bashkëpunojë me autoritetet në Kosovë.
Noa.al
Noa.al