Tiranë, 2 persona vdesin nga i ftohti

I ftohti shënoi viktimat e para në Tiranë. Dy persona kanë gjetur vdekjen si pasojë e temperaturave të ulëta që kanë “pushtuar” së fundmi kryeqytetin dhe gjithë Shqipërinë, raporton gazeta Panorama. Viktimat janë dy të moshuar, të cilët kanë gjetur vdekjen në rrugë si pasojë e të ftohtit. Sipas Policisë, dy kalimtarë, njëri 67 dhe tjetri 70 vjeç, kanë vdekur në mes të rrugës si pasojë e të ftohtit që u ka shkaktuar bllokim të frymëmarrjes dhe infarkt. Të paktën kështu janë përcaktuar paraprakisht shkaqet e vdekjes së tyre në Institutin e Mjekësisë Ligjore në Tiranë. Në të dyja rastet kanë qenë kalimtarët ata që kanë lajmëruar Policinë, në mënyrë që t’u vinin në ndihmë personave që ishin shembur në tokë para syve të tyre, por pa kuptuar që ata kishin ndërruar jetë. /rtvfan/