Hostel
Anëtar i Nderuar
Premtohet ruajtja e vlerësimi i objekteve me vlera historike dhe arkitektonike
Plani i ri rregullues i Tiranës, parashikon që në fazën e parë dhe të dytë të tij të krijojë pesë nënqendra të rëndësishme, në katër njësi bashkiake në kryeqytet. Risitë dhe detajet e këtij plani po prezantohen nga vetë kryetari i Bashkisë së Tiranës, Edi Rama, në një tur konsultimesh me emrin dëgjesat publike. Dje, Rama është takuar me banorë të Njësive Bashkiake Nr. 4, 8, 9, 11 të kryeqytetit, territori i së cilave bën pjesë në zonat që do të zhvillohen përgjatë fazës së parë dhe të dytë, të Planit Rregullues. Pjesa më spektakolare e planit mbetet hekurudha nëntokësore, mbi të cilën do të krijohet një park i gjelbëruar. Por, mes risive të rëndësishme është edhe parashikimi i shërbimit të tramvajeve, që do të përmirësojë shërbimin e transportit publik.
Ndryshimet
Sipas kryebashkiakut Rama dhe planit të ri rregullues, pesë nënqendrat e reja të Tiranës do të tjetërsohen. Kështu, Kodër Kamza do të shndërrohet në një kampus dhe zonë mikse, ku do të zhvillohen aktivitete të ndryshme. "Josif Pashko" dhe Pularia parashikohet të tjetërsohen, ku në vend të asaj që shihet sot do të ketë një stacion treni dhe një tjetër zonë mikse, ku, përveç aktivitetit tregtar e të shërbimeve, nuk përjashtohet as ai argëtues e kulturor. Lidhur me zonën që përfshin segmente te Treni dhe Blloku i Magazinave, është parashikuar që të jetë një vijim i bulevardit, por edhe një zonë polifunksionale. Zona e Kinostudios dikur e artë, por tashmë e rrënuar, mendohet të shndërrohet në një pol kulturor, ku nuk do të mungojnë edhe funksionet mikse të një qendre të re. Ndërsa për repartin ushtarak dhe zonën tek Antibiotiku është hedhur ideja e ngritjes së një kampusi universitar, e shoqëruar nga një zonë kërkimesh shkencore dhe territore të tjera me shërbime nga më të ndryshmet, pra mikse. Në skemën e përfitimit nga plani i ri rregullues do të jetë edhe Kamza, për të cilën është menduar përmirësimi i kampusit ekzistues universitar. Një tjetër kampus i ri mendohet të krijohet në rrugën "Myslym Keta", së bashku me një qendër kërkimesh shkencore, laboratorë etj. Ndërsa në Kinostudio premtohet se zona do të fuqizohet edhe me aktivitete të polit kulturor ekzistues.
Parqet dhe transporti
Të tjera ndërhyrje premtohet se do të kryhen edhe në hapësirat e gjelbra, aq shumë të debatuara gjatë ditëve të fundit. Kryetari i Bashkisë së Tiranës ka shpjeguar se plani i ri sjell edhe krijimin e parkut përgjatë lumit të Tiranës. Por, përveç tij, një tjetër park mendohet të krijohet gjatë shinave të trenit. Më spektakolarja është ideja gjithnjë e përmendur, por asnjëherë e konkretizuar në një plan studimor. Ajo e kalimit nëntokë të hekurudhës, që për kryebashkiakun do të lehtësojë lidhjen organike, midis lindjes dhe perëndimit dhe lidhjen e gjelbër midis qendrës e Parkut të Paskuqanit. Për zonat ekologjikisht të ndjeshme si Mali i Dajtit, Lumi i Tiranës etj., është premtuar krijimi i brezave mbrojtës të tyre. Ndërsa periferitë e sotme të Tiranës që synohet të tjetërsohen në parqe të zhvilluara si Paskuqani e Dajti do të kenë lidhje, duke u përfshirë në hartat e transportit publik. Në këto zona të reja premtohet se do të krijohen parqe për zhvillim (përafërsisht rreth 20-30% e zonës, si hapësirë kompakte). Gjithashtu, parashikohet krijimi i lidhjeve të shpejta të zonës, promovimi i transportit alternativ, ndërtimi i Unazës së Madhe, fuqizimi i transportit mbi shina: ku nuk do të mungojnë as trenat, as tram-et. Por do të ketë edhe ristrukturim urban, hapje rrugësh të reja në brendësi të blloqeve etj. Një tjetër vend në planin e ri rregullues zënë edhe mundësitë e zgjerimit të shërbimeve spitalore, si dhe një akses më i lehtësuar në këto territore, si zgjerimi tek ish-Uzina "Partizani". Me rritjen e vazhdueshme të numrit të popullsisë, një nga nevojat e kryeqytetit, që ka lindur sidomos gjatë viteve të fundit, është edhe zgjerimi i varrezave. Në planin e ri mendohet se ky zgjerim do të orientohet drejt veriut të varrezave të Tufinës, ku pritet të bëhet edhe rezervimi i tokës. Po ashtu, do të ketë përshtatje të zonave të prodhimit dhe lidhje të tyre me transportin publik. Transformimi i ish-zonave industriale të degraduara, në zona me funksione mikse (ekonomi, banim, sociale etj.), është një tjetër ambicie e madhe e këtij plani rregullues për Tiranën e së nesërmes, që, veç të tjerash, do të vijojë me sistemimin e hapësirave publike, në zonat tashmë të formuara.
Vlerat historike
"Identifikim dhe vlerësim të objekteve me vlera historike, arkitektonike të zonës, përcaktimi i bonusit për këto objekte, si nxitje për të konservuar trashëgiminë kulturore". Ky është një tjetër synim, që pretendohet të arrihet me planin e ri.
Kryebashkiaku Rama në këtë drejtim theksoi mundësitë që ofron ky plan për të sistemuar hapësirat publike në zonat e formuara, si dhe për të vlerësuar objektet me vlera historike dhe arkitektonike në pjesën e vjetër të kësaj zone të Tiranës, "duke përcaktuar si mekanizëm edhe një vend për këto objekte dhe zotëruesit e tyre që duhet të mbështeten nga shteti në konservimin e trashëgimisë kulturore". Rama vuri në dukje se kjo është një ambicie që shkon paralel me ambicien e atyre qindra mijëra familjeve kryeqytetase, autoktonë apo të ardhur të rinj, që synojnë një të ardhme shumë më të mirë për veten e tyre dhe që duhet të kenë garanci për një të ardhme shumë më të mirë për komunitetin ku jetojnë.
