Dritan Dajti, autor i vrasjes së katër oficerëve të policisë vazhdon që të tallet me drejtësinë shqiptare. Mungesa e avokatit të tij, ka bërë që procesi gjyqësor të shtyhet për të 203-ën herë radhazi, ndërsa vetë Dajti u shpreh në seancë se ai nuk është autori i shtyrjeve.
Dajti ka deklaruar në gjykatë se e gjithë kjo seri shtyrjesh ndodh për shkak të gjykatës, pasi sipas tij, nëse do të ishte pranuar kërkesaj e tij për gjykim të shkurtuar, që do ta shpëtonte atë nga burgimi i përjetshëm, gjyqi mund të përfundonte brenda një seance. “Nuk jam unë që po i shty seancat, por jeni ju në pamundësi për të më gjetur mua një avokat mbrojtës”-ka thënë Dajti në seancë.
Procesi gjyqësor ndaj Dritan Dajtit është unik në llojin e vet, pasi që prej nisjes së tij në vitin 2009, është zvarritur pafundësisht, duke qenë se ai refuzon çdo avokat, ndërkohë që KLD-ja nuk ka mundur që ta zgjidhë këtë ngërç.
Dritan Dajti akuzohet se më 7 gusht 2009, në vendin e quajtur 'Pista Iliria' në Durrës, ekzekutoi brenda pak minutash, katër oficerët e Skuadrës speciale operacionale: Fatos Xhanin, Saimir Duckollarin, Altin Dizdarin dhe Kastriot Feskajn, të cilët tentuan t'i vinin prangat pas shtatë vitesh në arrati.
/Shekulli Online/Përgatiti: E.Sh/
