Vetëm tre ditë pas arrestimit është plagosur kryetari i Komunës Rrethina të Shkodrës. Ngjarja ka ndodhur në ambientet e burgut të Shën-Kollit. Sipas të dhënave paraprake, Kleves Muja, 38 vjeç, është plagosur me kaçavidë në fyt në burgun e Shën-Kollit në Lezhë nga i burgosuri Xheladin Kruja.
Muja është transportuar me urgjence në Spitalin Ushtarak në gjendje të rëndë shëndetësore ndërsa vijon puna për zbardhjen e rrethanave të ngjarjes. Ndërkohë ai sapo ka dalë nga salla e operacionit dhe mjekët shprehen se ka një plagë pas koke dhe është në rrezik për jetën. Kirurgët nuk japin garanci për jetën e Mujës, sepse ka dëmtime edhe në tru.
Autori i ngjarjes Xheladin Kruja nga Shkodra e ka qëlluar Mujën me kaçavide gjatë kohës kur bashkë me të dënuarit e tjerë ishin në orarin e ajrosjes në burgun e Shën-Kollit. Dyshohet se mes Mujës dhe Krujës të ketë patur konflikte të vjetra. Do të jenë hetimet e mëtejshme që do të zbardhin shkaqet e plagosjes së rëndë në burgun e Shen-Kollit.
Autori vuan dënimin me 12 vjet burg për vrasje. Ndërkohë arrestimi i Kleves Mujës është kryer pasi autoritetet italiane të drejtësisë në Bari kanë lëshuar ndaj tij urdhër arrestin ndërkombëtar për veprën penale të “trafikut ndërkombëtar të lëndëve narkotike”. Muja, mori masën me 40 ditë burg me qëllim nisjen e procedurave për ekstradimin në Itali. /L.Kokaj/
Marr nga Shekulli
