Protesta e 13 majit, Basha: Nesër merr fund Republika e Vjetër

Protesta e 13 majit, Basha: Nesër merr fund Republika e Vjetër



Kreu i Partisë Demokratike Lulzim Basha iu bëri thirrje të gjithë shqiptarëve që të bashkohen në protestën e 13 majit për të rrezuar Republikën e Vjetër dhe të sjellin në pushtet Republikën e Re. Sipas tij, nesër nis besimi i patundur për të ardhmen më të mirë, për të rrëzuar nga themelet Republikën e vjetër të vesit dhe korrupsionit, të krimit dhe dogës, të pazareve të ndyra politike, të kupolës së vjetër politike që siç tha ai, luajti gjithë këto vite teatrin e ndyrë të kukullave në kurriz të shqiptarëve.

“Nesër nis rrugëtimi i bashkimit të shpresave të çdo shqiptari të ndershëm, vendimit të madh për të rrëzuar nga themelet dhe me forcën e bashkimit Republikën e Vjetër të korrupsionit dhe të pazareve të ndyra politike e kupolës së vjetër politike që luajti gjithë këto vite teatrin e ndyrë në kurrizin e të gjithë shqiptarëve dhe për të themeluar që nesër përmes forcës së bashkimit republikën e qytetarëve shqiptarëve.

E nesërmja do të hyjë në historinë kombëtarë sepse është dita e një bashkimi të paparë e të padëgjuar ndër vite e dekada. Nesër nis rrugëtimi i shpresave të çdo shqiptari. Republika e Re do i hapë rrugën arsimit dinjitoz, me tarifa të përballueshme që çdo shqiptar të ndjekë studimet, pavarësisht gjendjes ekonomike. Ky do të jetë ligji i parë i Republikës së Re, që lind nga bashkimi”, tha Basha.

Protesta e opozitës është caktuar të mbahet nesër në orën 12:00 para kryeministrisë, aty ku aktualisht ndodhet çadra e ngritur prej 18 shkurtit 2017.
(gazeta-Shqip.

Protesta, ambasada italiane këshillon qytetarët e saj: Shmangin qëndrimin përreth çadrës



Ambasada italiane, nëpërmjet një njoftimi në faqen e saj zyrtare paralajmëron të gjithë qytetarët e saj që janë rezidentë në Shqipëri, që të tregohen sa më të kujdesshëm ditën e shtunë dhe të shmangin lëvizjet në bulevardin “Dëshmorët e Kombit”, për shkak të protestës së opozitës.

“Ditën e shtunë, 13 Maj do të mbahet në Tiranë një protestë e opozitës që nis rreth orës 12:00 në bulevard, në selinë e Kryeministrisë. Rekomandojmë të shmangni zonën ku do të zhvillohet protesta dhe grumbullimet e tjera përgjatë gjithë bulevardit.

Sa për ata që do të marrin pjesë në paradën ‘Gay(P)ride Parade’, që organizohet në një vend aty pranë në të njëjtën ditë, këshillohen që të shmangin çdo kontakt me mitingun e opozitës.

Gjithashtu këshillohen qytetarët që të shmangin qëndrimin përreth çadrës së ngritur nga opozita në bulevard”, njofton ambasada.

(gazeta-Shqip.