Lulzim Basha lindi më 12 qershor 1974 në kryeqytetin shqiptar, ndërsa sot është i përfshirë në garën për të udhëhequr Tiranën si qytetari i parë i saj.
Përmbledhtas në Enciklopedinë në internet, Uikipedia, Lulzim Basha prezantohet si jurist dhe politikan shqiptar, ministër i suksesshëm i këtij vendi për shkak të ndërtimit të rrugës së kombit Durrës-Kukës, dhe aktivitetit të tij në diplomacinë shqiptare me produkte konkrete:
Shqipëria anëtare e NATO-s, shqiptaret udhëtim pa viza në Bashkimin Evropian.
Basha do të kryente studimet në universitetin e Utrehtit në Holandë, duke u specializuar në të Drejtën Europiane dhe Ndërkombëtare.
Karriera e tij profesionale nisi në maj të 1998-ës, ndërsa deri në 1999-ën ishte pjesë e skuadrës së hetimit të krimeve të luftës nga forcat serbe në Kosove: Tribunali Ndërkombëtar për Krimet e Luftës në ish-Jugosllavi.
Në vitet 2000- 2001 u emërua Këshilltar Ligjor në Departamentin e Drejtësisë të UNMIK.
Deri në vitin 2002, Basha ishte zv/shef i kabinetit të Drejtorit të Departamentit të Drejtësisë UNMIK.
Dhe nga nëntori i këtij viti deri në 2005-ën ai ishte Këshilltar Special për Tranzicionin, përgjegjës për përgatitjen e ministrisë së ardhshme të Drejtësisë në Kosovë.
Karriera politike e Lulzim Bashës në Shqipëri nis në vitin 2005.
Ai iu bashkua Partisë Demokratike të udhëhequr nga kryeministri Sali Berisha në janar të 2005-ës, dhe brenda pranverës së këtij viti u përfshi në strukturat drejtuese të Partisë Demokratike me zgjedhjen anëtar i Këshillit Kombëtar dhe Kryesisë.
Afrimi i Bashës me selinë blu u bë në kuadër të krijimit të Komitetit të Orientimit të Politikave, një ekip ekspertesh i thirrur nga demokratët 8 vjet në opozitë, ekip që përcaktoi fitoren e Partisë Demokratike më 3 korrik 2005, nën sloganet “Koha për ndryshim” dhe “Me duar të pastra” .
Lulzim Basha u bë koordinatori i KOP-it, komisionet e të cilit shpallën 17 projekt- platforma qeverisëse për Partinë Demokratike.
Basha ishte edhe zëdhënës i fushatës elektorale, për t’u përfshirë pas zgjedhjeve të 3 korrikut në radhët e 140 deputeteve ne Kuvendin shqiptar, në legjislaturën e tij të XVII-të.
Në shtator të atij viti, Lulzim Basha, do të merrte besimin e kryeministrit të ri të vendit, Sali Berisha për drejtimin e Ministrisë së Punëve Publike, Transportit e Telekomunikacionit.
Ai konkretizoi në mënyrë optimale, pavarësisht akuzave, premtimin kryesor të demokrateve për infrastrukturën e vendit, atë që sot quhet rruga e Kombit, kryevepra e infrastrukturore e vendit me tunelin e Kalimashit rreth 6 kilometra të gjatë.
Në maj të 2007-ës, Basha merr postin e ministrit të Jashtëm. Vetëm pas pak ditësh, ai do të takohej me Sekretaren e Shtetit, Kondoleza Rise, një takim që i pararendi vizitës historike të presidentit amerikan Xhorxh Bush në Tiranë, i cili dha dy mesazhet e rëndësishme për shqiptarët, pavarësinë e Kosovës, dhe anëtarësimin e Shqipërisë në NATO.
Në krye të ministrisë së Jashtme, Basha qëndroi deri në 2009-ën, kur dhe u mbajtën zgjedhjet e përgjithshme parlamentare, që mbajtën Partinë Demokratike në pushtet dhe Bashën deputet të Kuvendit të Shqipërisë, i zgjedhur kësaj here në qarkun e Elbasanit.
Në shtator të 2009-ës, Lulzim Basha, në kabinetin “Berisha 2” merr drejtimin e Ministrisë së Brendshme, ndërsa vijoi punën e nisur si shef diplomacie për përmbushjen e kushteve të udhërrëfyesit për liberalizimin e vizave, ngushtësisht i lidhur me Ministrinë e Brendshme, punë e mbyllur suksesshëm, teksa më 15 dhjetor të 2010-ës qytetarët e prekën vetë realitetin, duke lëvizur me një pasaportë biometrike në vendet e hapësirës Shengen, larg radhëve të ambasadave.
Por përgjatë gjithë vitit, të gjithë kishin filluar të shinin tek Lulzim Basha, rivalin e vetëm të Edi Ramës për Bashkinë e Tiranës në zgjedhjet që presidenti Topi i dekretoi më 8 maj të 2011.
Ndonëse zyrtarizimi vonoi deri në afate që ligji përcakton, disa herë kryeministri Berisha, e konfirmoi atë përmes batutave.
Madje fakt i kryer ishte bërë dhe për ambasadorët në Tiranë, teksa Bashën e komentonin pa druajtje si garues për Tiranën.
Pritshmëria e të gjithëve zyrtarizohet.
Basha dorëhiqet nga posti i ministrit të Brendshëm dhe si deputet i Kuvendit të Shqipërisë, duke u përqendruar në një fushatë qytetare, me një bosht kryesor, se për të dhe koalicionin qeverisës qytetarët janë të parët, e në rastin e Bashës, Tirana është e para.
Larg retorikës politike, ai shpalli ofertën e tij për Tiranën dhe atë se kush është Edi Rama për Lulzim Bashën.
JETثSHKRIMI, KARRIERA
Datëlindja
12. 06. 1974, Tiranë
Arsimi
Utreht, Holande - E Drejta Europiane e Ndërkombëtare
Karriera profesionale
1998 – 1999 - Pjesë e skuadrës së hetimit të krimeve të luftës të ish- Jugosllavisë, në Tribunalin Ndërkombëtar, Hagë
2000- 2001 - Këshilltar Ligjor në Departamentin e Drejtësisë të UNMIK
2001 - 2002 - Zv. shef i Kabinetit të drejtorit, Departamenti i Drejtësisë, UNMIK.
2002 – 2005 - Këshilltar Special për Tranzicionin, përgatiti Ministrinë e ardhshme të Drejtësisë në Kosovë
Janar 2005 - Basha nis karrierën politike
Themelohet Komiteti i Orientimit te Politikave, pranë PD/ Lulzim Basha, anëtar, koordinator i KOP-it
Pranverë 2005 - Anëtar i Këshillit Kombëtar, anëtar kryesie
Zgjedhjet 2005 - Zëdhënës i fushatës zgjedhore
Korrik 2005 - Deputet i Kuvendit, legjislatura e VII-të
Shtator 2005 - Ministër i Punëve Publike, Transportit dhe Telekomunikacionit
Maj 2007 - Ministër i Punëve të Jashtme
Qershor 2009 - Deputet i qarkut të Elbasanit
Shtator 2009 - Ministër i Brendshëm
Prill 2011 - Kandidat i Aleancës për Qytetarin, për Bashkinë e Tiranës
8 Maj 2011 …..
abc news