Titulli: Përgjaket gjykata në sy të gjyqtares, bashkëshorti dhunon të shoqen
Gruaja e gjakosur në Gjykatën e Fierit, në mëshirë të fatit
Gjykata nuk e jep urdhrin e mbrojtjes nga bashkëshorti i dhunshëm
Gruaja 41-vjeçare nga fshati Seman i Rrethit të Fierit, nënë e dy fëmijëve, e cila u dhunua fizikisht nga ish-bashkëshorti në ambientet e Gjykatës së Shkallës së Parë të Fierit, teksa pritej që të caktohej urdhri i mbrojtjes për të, deri tani nuk ka arritur ta sigurojë këtë urdhër. Për shkak të ngjarjes, që tronditi edhe gjyqtaren e çështjes dhe kolegë të tjerë të saj të Gjykatës së Fierit, seanca e parashikuar për caktimin e urdhrit-mbrojtës për herë të tretë për 41-vjeçaren Zhaneta Peto dhe dy fëmijët e saj të mitur, nuk u krye. Që prej së hënës së kësaj jave, ajo dhe fëmijët e saj nuk mbrohen nga ligji, edhe pse u dhunua në zyrën e gjyqtares nga ish-bashkëshorti Anesti Mëngjesi, i cili tashmë po hetohet në gjendje të lirë. Për shkak të cilësimit të dëmtimit si pasojë e goditjeve me grushte dhe përplasjes së kokës në mur, si “plagosje e lehtë” prej mjekut-ligjor, policia dhe prokuroria në zbatim të Kodit të Procedurës Penale po e hetojnë në gjendje të lirë 47-vjeçarin Anesti Mëngjesi. Kjo, për shkak se plagosja cilësohet si kundërvajtje penale dhe jo si vepër penale dhe për këtë arsye, të gjithë personat që e konsumojnë këtë ndiqen në gjendje të lirë. Në këto kushte, ligji nuk e ndalon 47-vjeçarin Anesti Mëngjesi që e masakroi ish-bashkëshorten në prezencë të gjyqtares në zyrën e saj, që t’i afrohet së dëmtuarës dhe fëmijëve.
Ndërkaq, burime zyrtare nga Drejtoria e Policisë së Qarkut të Fierit, të pyetur nga gazeta “Shqip”, janë shprehur se nuk u është përcjellë nga gjykata ndonjë vendim urdhër-mbrojtje për të dëmtuarën Zhaneta Peto dhe dy fëmijët e saj. Burimet theksojnë se në këto kushte janë ngarkuar inspektorët e zonave që operojnë në fshatrat Pojan dhe Seman që të kenë nën kontroll situatën, për çdo shqetësim të mundshëm të pretenduar nga 41-vjeçarja. Burimet e bluve përfundojnë se janë në kontakt të vazhdueshëm si me Zhanetën, si dhe me ish-bashkëshortin e saj, Anestin, për të shmangur dhe parandaluar çdo konflikt të mundshëm.
Në seancën gjyqësore të së hënës pritej që gjykata të vendoste për të tretën herë urdhër-mbrojtjen për 41-vjeçaren Zhaneta Peto dhe për dy fëmijët e saj. Urdhri ishte kërkuar prej saj, pasi e kishte denoncuar ish-bashkëshortin për ushtrim të dhunës ndaj saj dhe fëmijëve, që ishte bërë edhe shkak i divorcit mes tyre. Ajo ka arritur të fitojë divorcin dhe kujdesin e dy fëmijëve të mitur, djalit 13-vjeçar dhe vajzës 11 vjeçe. Por, edhe pas ndarjes me ish-bashkëshortin, Zhaneta e ka denoncuar atë për ushtrim të dhune. Për këtë arsye Gjykata e Shkallës së Parë të Fierit ka vendosur urdhër-mbrojtje që i ndalonte Anestit t’u afrohej ish-bashkëshortes dhe fëmijëve, si dhe të kontaktonte në mënyra të tjera. Gjatë një interviste të dhënë për gazetën, Zhaneta pretendoi se ish-bashkëshorti kishte kontaktuar me fëmijët, kryesisht nëpërmjet telefonit dhe për këtë arsye ka kërkuar sërish urdhër-mbrojtjen.
Ajo i bëri apel policisë dhe institucioneve të tjera të drejtësisë që ta mbronin atë dhe fëmijët e saj, duke e cilësuar ish-bashkëshortin të dhunshëm. “Nëse ai më dhunoi barbarisht në ambientet e gjykatës, si mund të lihet i lirë dhe çfarë sigurie kam unë apo fëmijët e mi nëse eci rrugës”, tha Zhaneta Peto, në një intervistë për gazetën.
G.SHQIP
