Kush duhet ta paguajë darkën?
Psikologët britanikë kanë studiuar sesi ndikon atraktiviteti fizik i atij dhe i asaj në gatishmërinë e ndarjes së pagesës
Michael Stirrat dhe bashkëpunëtorët e tij nga Universiteti ‘St. Andrews’ janë nisur nga fakti i mirënjohur se sigurimi i ushqimit bën pjesë në vardisje te shumë lloje kafshësh, nga gjinkallat e deri te shimpanzetë, ku te shumica e këtyre kafshëve është mashkulli ai që e siguron ushqimin për femrën. Por, ata kishin supozuar edhe se kualiteti i mashkullit, respektivisht femrës në këtë lojë, ndikon në gatishmërinë e investimit në lojë.
Për këtë shkak, ata kanë organizuar takime hipotetike, pa u parë çiftet më parë, duke i pyetur pjesëmarrësit se sa do të ishin të gatshëm që të merrnin pjesë në pagimin e faturës së darkës.
Në studim kishin marrë pjesë 245 meshkuj dhe 171 femra. Ata më parë kishin vlerësuar se sa e konsiderojnë veten atraktivë, e më pas shkencëtarët u kishin treguar 12 fotografi të personave të gjinisë së kundërt, të cilat dallonin midis personave jo të pashëm, deri te ata tepër të pashëm.
Pjesëmarrësve në studim u duhej që të paramendonin se kanë dalë në darkë me ata persona dhe të thoshin se sa do të ishin të gatshëm që të merrnin pjesë në pagimin e darkës. Gati gjysma e femrave dhe e meshkujve ishin treguar të gatshëm që ta ndanin pagesën përgjysmë. Në pajtim me normat shoqërore, diçka më shumë meshkuj kishin deklaruar se ishin të gatshëm që ta paguanin tërë faturën.
Por, ata persona që e konsideronin veten tepër atraktivë, ishin më pak të gatshëm që të paguanin, pa marrë parasysh gjininë.
