Nedelkov: Deklarata e Ademit për dialog, presion ndaj mësimdhënësve

Deklarata e Ministrit të Arsimit se me sindikatën mund të bisedohet vetëm pasi të ndërpritet greva, është presion ndaj mësimdhënësve për të hequr dorë nga bojkoti. Kështu vlerëson kreu i sindikalistëve Jakim Nedellkov duke theksuar se greva mund të ndërpritet vetëm atëherë kur nga ministritë përgjegjëse, SASHK-u do të marr ofertë pozitive.

“Greva sot ka hyrë në ditën e tetë dhe për ne është absolutisht e papranueshme ne tani në këtë moment ta ndërpresim atë dhe të nisim bisedime. Kjo është një kushtëzim ndaj nesh, të ndërpresim grevën që më pas të bisedojmë! Bisedimet përfunduan, ne qartë kërkuam vazhdim të tyre, por jo në kushte të kërcënimeve apo urdhrave që të ndërpritet greva. Nëse për MASH-in është presion greva jonë, edhe për ne është presion që të kërkohet nga ne të ndërpritet greva”, tha Jakim Nedellkov, kryetar i SASHK-ut.

Kreu i sindikalistëve thotë se testimi ekstern po rrjedhë në mënyrë kaotike, njëjtë sikur edhe procesi mësimor. Nedellkov thotë se pothuajse të gjitha shkollat ku është mbajtur testimi ekstern, janë regjistruar parregullsi dhe nuk do të pranohet rezultati i testimit.

“Me forcë po thuhet se testimi ekstern po mbahet, por nuk është kështu, edhe atje ku po mbahet, gjendja është kaotike. Nga të dhënat tona mësohet se rolin e mësuesve testator po e kryejnë të punësuar nëpër komuna, inspektorë të ndryshëm. Atje ku po mbahet testimi ekstern, nxënësve po u lejohet kopjimi i përgjigjeve”, u shpreh Jakim Nedellkov, kryetar i SASHK-ut.

Nedellkov kujtoi Ministrin Ademi se mësuesit për aq kohë sa janë në grevë dhe për aq kohë sa Sindikata që i përfaqëson ata nuk pranohet nga autoritetet kompetente të zhvilloj dialog social, mësuesit do të t’i paguajë MASH-i. Një ditë më parë Ministri i Arsimit Abdilaqim Ademi tha për ALSAT-M se dikasteri i tij nuk do të lëshojë paga mujore për mësuesit grevistë pasi ata, sipas ligjit, duhet t’i paguaj SASHK-u, kurse mësuesit që nuk janë anëtarë të sindikatës, për fat të keq nuk do të marrin pagë as nga MASH-i e as nga sindikata. Valmir Kuçi.


Gati 8 dite ne greve, e keta qeveritaret, politikanet tane, smarrin guximin te ulen e te bisedojn rrethe kesaj ceshtje...S'habitem, pasi injoranti, sdin gje tjeter pervec te injoroj....edhe mediat i perkrahin...gjithe Maqedonia, gjithe shkollat jane ne grev, lajmet transmetojn genjeshtrat e partive te qelbura.....

Titulli: Nedelkov: Deklarata e Ademit për dialog, presion ndaj mësimdhënësve

Romer: Arsimi me gjoba nuk mund të jetë funksional


Konfederata Evropiane e Sindikatave të Arsimit mbështet grevën e punonjësve të arsimit në Maqedoni dhe bën thirrje për dialog mes Qeverisë dhe Sindikatës për realizimin e kërkesave të saj. Martin Romer theksoi se dialogu social nuk ka mbetur në qorr sokak dhe se ka hapësirë për të, duke shtuar se në asnjë sistem në botë nuk funksion kështu si në Maqedoni, të rritet cilësia e arsimit duke gjobitur dhe dënuar mësimdhënësit.

“Ne jemi të informuar se si kanë ecur gjërat deri më tani. Bazuar në këtë, e mbështesim SASHK-un në kërkesat e saj. Maqedonia ka përgatitur një model i cili bie ndesh me profesorët dhe konsideroj se nuk bëhet fjalë për vendim të mirë. Jemi këtu për dialog social dhe për t’i dhënë mundësi dy palëve që të ulen në tavolinë dhe të diskutojnë. Madje të gjitha palët e përfshira duhet të jenë pjesëmarrës në proces. Askund në Evropë dhe në botë, në asnjë sistem, arsimi nuk funksionon me gjoba. Ky është koncept i padobishëm, pasi që gjobat nuk janë as zgjidhje as mundësi”, tha Martin Romer, Kryetar i KESA-së.

Ndërkaq, kryetari i sindikatës së arsimit Jakim Nedellkov theksoi se bojkoti i përgjithshëm vazhdon dhe se sindikata që ai udhëheq pret mbështetje më të madhe.

"Shumë herë e kam thënë dhe po e them se bojkoti i përgjithshëm i SASHK-ut vazhdon, ne shkojmë në vendet e punës por nuk i kryejmë obligimet. Edhe kolegët tonë të cilët janë në bojkot, nuk marrin pjesë në testimin ekstern. Po e them prapë, ne jemi në bojkot të përgjithshëm. Kemi dëshmi ku kemi dhënë se jemi pro testimit ekstern, por kundër gjobave dhe shpërblimeve. Mund t’ju tregojmë kur të doni se SASHK-u asnjëherë nuk i ka mbështetur këto masa”, u shpreh Jakim Nedellkov, Kryetar i SASHK-ut.

Nga Sindikata e Arsimit njoftuan se gjatë ditës do të mbajnë mbledhje për të shqyrtuar situatën e deritanishme, presionet, kërcënimet dhe bojkotin. Kreu i Konfederatës Evropiane të Sindikatave të Arsimit Martin Romer, sot kishte zhvilluar takim edhe me Ministrin e Arsimit Abdilaqim Ademi dhe atë të Punës dhe Politikës Sociale, Dime Spasov, para të cilëve kishte shpalosur sugjerimet e tij për dialog social. Adrian Kerimi