Projektligji për “Menaxhimin e integruar të mbetjeve”, i cili është pjesë e votimit më 22 shtator, ka nxitur reagimin e deputetes së Partisë Socialiste, Mimoza Hafizi. Në një reagim në facebook, deputetja shprehet lidhur me inciativën ligjore të tre kolegëve të saj socialistë.
Ajo është shprehur se ky projektligj është në tradhti ndaj mijëra qytetarëve dhe kërkon tërheqjen e tij.
“Tradhti nda të gjithë personave që kërkuan referendumin. Importimi i plehrave në vendin tonë rrezikon rëndë shëndetin e qytetarëve”, ka deklaruar Hafizi.
Ndërkohë kryekomisioneri i Veprimtarisë Prodhuese, Eduard Shalsi, i cili është një nga firmëtarët e draftit, ka zhvilluar dje një mbledhje me dyer të mbyllura, pa praninë e medias, vetëm me grupet e interesit për këtë projekt, në formën e një seance dëgjimore.
Mesazhi i plotë
Kujtdo mund t’i kujtohet furtuna e madhe popullore e viteve 2012-2013 për ndryshimin e Ligjit Nr. 10463, datë 22.9.2011, “Për menaxhimin e integruar të mbetjeve”, ligj i cili, nga pikëpamja formale, ka patur problem vetëm se nuk ka ndaluar importin e mbetjeve. Rreziku i madh që i kanosej mjedisit shqiptar nga ky import si dhe demotivimi që importi i mbetjeve i shkakton gjithë procesit imperativ të përdorimit të mbetjeve shqiptare për të mirën e mjedisit dhe të ekonomisë sonë, i ngriti në këmbë shqiptarët në ato kohë. Aleanca Kundër Importit të Plehrave arriti të mblidhte 65 mijë firma me kërkesën për referendum popullor, për shfuqizimin e neneve përkatëse të ligjit.
Ky referendum do të zhvillohej në dhjetor 2013. Por referendumi u anulua, sepse Qeveria e Rilindjes inicioi një ligj për shfuqizimin e të gjitha neneve që lejonin importin e mbetjeve. Atëkohë qeveria shprehej fjalë për fjalë se importi i mbetjeve bie në kundërshtim me qëllimin e mbrojtjes së mjedisit dhe të shëndetit të njeriut dhe se ky import bie ndesh me përparësinë që duhet të ketë trajtimi i mbetjeve që prodhohen nga tregu shqiptar. Ky ligj u votua me 10.10.2013 dhe në këtë situatë, referendumi u deklarua i panevojshëm.
Pojektligji i ri që kërkohet të miratohet brenda shtatorit i kthen mbrapsht nenet e anuluara në 2013. E konsideroj si tradhti ndaj dhjetra mijë shqiptarëve që firmosën për referendum në 2013 dhe po kështu ndaj miliona shqiptarëve, të cilëve iu hoq e drejta e referendumit përmes ligjit të parë të Qeverisë së Rilindjes. Rikthimi i situatës së mëparshme është pabesi flagrante.
I mbetem të gjitha argumenteve se importi i mbetjeve rrezikon rëndë mjedisin dhe shëndetin e qytetarëve të vendit tonë. Mendoj se kjo çështje, e cila prek secilin prej nesh, duhet të ngrejë peshë çdo shqiptar.
Gazeta Koha Jone.
