BERLIN-Kancelarja Angela Merkel ka paralajmëruar se klima ekonomike gjermane në vitin 2013 do të jetë "edhe më e vështirë." Në mesazhin e saj për Vitin e Ri, ajo tha se kriza e borxhit e eurozonës ende nuk kishte mbaruar, bën të ditur agjencia e lajmeve BBC. Ndërkaq, Merkel u shpreh se reformat e projektuar për t’i dhënë zgjidhje problemit kanë filluar të japin fryte.
Komentet e kancelares bien në kundërshtim me ministrin gjerman të Financave, Wolfgang Schaeuble, i cili tha javën e kaluar se pjesa më e vështirë e krizës tashmë ishte kaluar. Në një intervistë të regjistruar për t’u transmetuar të hënën, Merkel u bëri thirrje gjermanëve të jenë më të durueshëm. “Unë e di se shumë njerëz janë të shqetësuar vetvetiu, ndërsa ndërron viti”, tha ajo. “Vitin e ardhshëm situata ekonomike nuk do të jetë më e lehtë, por edhe më e vështirë. Kjo nuk duhet të na dëshpërojë, por duhet të na nxisë të ecim përpara”.
/Shekulli Online/Përgatiti: I.S./