Kryetari i Partisë Demokratike, Sali Berisha deklaroi sot në mbrëmje se pengimi i votimit të mijëra zgjedhësve me karta të skaduara në garën për bashkinë e Himarës, është prova se si Edi Rama do të sillet në zgjedhjet e përgjithshme parlamentare të vitit që vjen.
Sot përsëri zgjedhjet në Himarë dëshmuan intolerancën e plotë, dëshmuan krimin monstruoz elektoral, shtetëror. Dëshmuan fytyrën e vërtetë të Edi Ramës. Sot Edi Rama ju mohoi të drejtën e votimit, e ushtrimit të të drejtës kushtetuese për votimin 6153 banorëve të Himarës se me pretekstin se atyre u kishin skaduar kartat e identitetit. Ky dënim, ky ndëshkim i qytetarëve të Himarës, se kartat e tyre kishin skaduar ndërkohë që kishte skaduar vetëm data, por nuk kishte ndryshuar asnjë nga elementët e sigurisë që dëshmonin identitetin e qytetarit, është një akt kriminal, është një akt që fakton për të qintën herë se me Edi Ramën, zgjedhje të lira nuk ka dhe nuk do të ketë.”
Berisha u ndal edhe te një tjetër problematikë e konstatuar më herët nga kreu i PBDNJ-së, Vangjel Dule, që lidhet me zgjedhësit fiktivë apo transferimin e vendbanimeve të qytetarëve nga bashkitë e tjera në Himarë para zgjedhjeve.
“Në Himarë sot votuan edhe qytetarë të ardhur nga Dropulli dhe zona të tjera, me karta identifikimi false, që skadonin në vitin 2070. Edi Rama faktoi për çdo shqiptar se për atë, nuk ekziston kushtetuta, nuk ekziston e drejta e votës për qytetarin shqiptar. Nuk ekziston shteti ligjor. Nuk ekziston interesi kombëtar. Të gjitha këto zhduken, asgjësohen para interesave të tij mafioze në gjirin e Gjipesë. Edvin Gjipeja sot ke dëshmuar me atë që u bëre zgjedhësve në Himarë, se ti je, i aftë të ndërmarrësh çdo akt, të shkelësh çdo ligj, kushtetutë, të shkelësh çdo interes kombëtar për interesat e tua mafioze në Gjipe, por dhe në zona të tjera të bregut.”
A2News.com