LONDER-Një pikturë në vaj e një plaku, që së fundmi është vërtetuar si vepër e Rembrandt-it, do të ekspozohet gjatë kësaj jave në Woburn Abbey në Bedfordshire.
Piktura, e njohur si ‘The Old Rabbi’, për herë të fundit është ekspozuar në vitin 1950 dhe prej asaj kohe ka qëndruar e varur në një dhomë private.
Vitin e kaluar, Ernst van de Wetering, një ekspert i njohur i artistit të shekullit 17, ishte ftuar për ta studiuar veprën.
Ai ka thënë se ‘ishte një mostër e shquar e artit të Rembrand-it që në mënyrë madhështore e përshkruan dinjitetin në moshën e shtyrë’.
“Ky është një zbulim dhe shtim i mirë i koleksionit të mrekullueshëm të artit holandez të abacisë”, tha menaxheri kryesor Jonathan Irby.
“Jemi shumë të emocionuar rreth sjelljes së kësaj pikture elegante para syrit publik”, tha Irby.
Besohet se piktura në abacinë Woburn dhe piktura në Gemaldegalerie në Berlin, që mendohet të jetë portreti i gruas së Rembrand-it Saskia, janë menduar si çifte.
Të dyja janë pikturuar në vitin 1643 në një tablo prej mogani dhe bashkëndajnë ngjashmëri në dizajn dhe në stilin biblik.
(d.b/BalkanWeb)