Titulli: Kurbin, breshëri automatiku ndaj një makine, vdes fëmija
Vrasja e fëmijës në Kurbin, arrestohet njëri prej autorëve
Ka përfunduar në prangat e policisë një prej vëllezërve Shkreta, si i dyshuar për atentatin e ndodhur në Fushë-Mamurras, ku mbeti i vrarë një fëmijë 9-vjeçar si edhe është plagosur një 62-vjeçar. Burime policore kanë bërë të ditur se është arrestuar shtetasi Ditmir Shkreta, 33 vjeç, dhe është shpallur në kërkim autori tjetër i krimit, vëllai tij, Altin Shkreta.
Vëllezërit Shkreta u kishin dalë në pritë familjes Llani, duke zbrazur një breshëri plumbash kallashnikovi në drejtim të automjetit me të cilën po udhëtonte 62-vjeçari Muharrem Llani, ku plumbat nuk kursyen jetën e vogëlushit 9-vjeçar, nipit të Muharremit. Ngjarja u shënua një ditë më parë, rreth orës 14:00, në kohën kur Muharrem Llani po shoqëronte me automjetin e tij tip Volkswagen me targa AA 141 BF, nga Mamurrasi, në fshatin Shpërdhet ku banonte, kunatën dhe nipin që kishte dalë nga shkolla.
Plumbat kanë përshkuar automjetin, duke vrarë vogëlushin 9-vjeçar Indrit Llani në prehrin e nënës së tij, e ndërsa kanë lënë të plagosur rëndë 62-vjeçarin Muharrem Llani. Mjeti ka lëvizur të paktën rreth gjysmë kilometri nga vendi i atentatit, pasi Llanaj ka arritur të largohet ashtu i plagosur, duke kërkuar ndihmën e banorëve në afërsi të një lokali, ndërsa atentatorët u larguan nga vendi i ngjarjes.
Policia shpalli në kërkim vëllezërit Altin dhe Ditmir Shkreta, përkatësisht 29 dhe 33 vjeç.
Ndërkohë sipas policisë, shtetasi Ditmir Shkreta lëvizte edhe me identitete të tjera (Vladimir, Alban etj), pasi i janë gjetur 5 pasaporta me identitete të ndryshme.
Në orët e vona të mbrëmjes është arrestuar njëri nga vëllezërve, pikërisht Ditmir Shkreta, rreth 33 vjeç. Gjatë kontrollit të ushtruar në banesën e tyre janë dhe sekuestruar edhe 3 armë zjarri, njëra prej të cilave dyshohet të jetë kryer edhe krimi ku mbeti i vrarë 9-vjeçari, dhe u plagos 62 vjeçari, i cili ishte edhe objekti i këtij atentati, ndërsa ka shpëtuar nëna e vogëlushit, që pa me sy vdekjen e të birit.
Burime nga Drejtoria e Policisë së Qarkut të Lezhës kanë deklaruar se ngjarja mund të ketë ndodhur për hakmarrje. Policia ka shoqëruar disa persona si dhe ka marrë dëshmitë e parë, në të cilat është pohuar se dy ditë më parë, Muharrem Llani, së bashku me vëllanë e tij, ishin konfliktuar me vëllezërit Shkreta, duke i rrahur barbarisht këta të fundit, ngjarje kjo që kishte ndodhur në qendër të qytetit të Mamurrasit.
Ky sherr i nisur dy ditë më parë me konfrontime fizike, ka degjeneruar të martën pasdite me përdorimin e armëve të zjarrit, ku mbeti i vrarë një fëmijë i pafajshëm.
Forca të shumta policie janë angazhuar për arrestimin e autorëve, njëri prej tyre është ndaluar në orët e vona të së martës, ndërsa po punohet për kapjen e 29-vjeçarit Altin Shkreta.
Ky është krimi i dytë i rëndë që ndodh në Kurbin brenda pak muajsh, pasi në fshatin Zhej pak muaj më parë, si pasojë e krimit në familje, babë e bir vranë vajzën dhe plagosën vëllanë.
/ Lindita Kokaj
Burimi:Shekulli