Në Spanjë bankat kërcënohen nga falimentimi, Greqia mbrohet nga diktati i kursimeve, Italia ka frikë se do të kthehet në viktimën tjetër të tregjeve financiare. Kurse Gjermania ndodhet aktualisht mes grindjeve partiake.
Gjendja është serioze. Aq serioze, saqë kancelaria gjermane Angela Merkel ka anuluar pjesëmarrjen e saj në takimin e Kombeve të Bashkuara që mbahet në Rio. Ajo ka marrë vendimin që pas takimit të G-20 në Meksikë, të mos shkojë në Brazil.
Ndërkohë që Europa është në flakë, në Berlin qeveria dhe opozita diskutojnë nëse do të hyjë dhe kur do të hyjë në fuqi, si dhe me çfarë kushtesh do të hyjë në fuqi pakti fiskal evropian për vendosjen e disiplinës më të madhe buxhetore. Parlamenti gjerman, Bundestag, duhet të nxjerrë ligjin përkatës, por kjo duhet të ndodhë me dy të tretat e parlamentarëve. Meqenëse qeveria nuk e zotëron dy të tretat, atëherë i duhen vota nga radhët e opozitës. Por opozita kërkon shpërblim. Ajo që kërkon ndër të tjera ta detyrojë qeverinë që të luftojë për futjen e një takse financiare mbi bizneset e bursës si dhe një paketë ekologjike zhvillimi në nivel europian.
Burimi:Shekulli