Tokio - Plakja e popullsisë japoneze është duke u përshpejtuar shumë kohët e fundit, ku sipas një studimi të publikuar sot, numri i njëqindvjeçarëve për herë të parë e kalon shifrën e 40 mijë personave.
''Rreth 40 399 persona janë më shumë se 100 vjeç në këtë vend, 4 000 persona më shumë se vitin e kaluar. Pothuajse 35 000, domethënë 87 për qind e tyre janë gra'', njoftoi ministri i Shëndetësisë.
Gruaja më e vjetër në Japoni është 114 vjeç dhe jeton në ishullin Okinawa, ku njëqindvjeçarët janë në proporcion dy herë më të shumtë se në pjesën tjetër të arkipelit. Një dietë e shëndetshme bazuar në perime, dhe klima e butë janë njohur si të fshehtat e jetëgjatësisë së banorëve të Okinawa-s.
Një ish-njëqind e dymbëdhjetë vjeçar që jetonte në Kioto ishte njeriu më i moshuar në vend. Ai qëndronte për orë të tëra duke lexuar gazeta.
Përveç numrit të shumtë të njëqindvjeçarëve, Japonia është përballur me një krizë demografike me një përqindje pjellorie nga 1,37 fëmijë për grua në 2008-n, ndërkohë që shkalla e nevojshme e pjellorisë duhet të jetë 2,07 për grua për të siguruar një rinovim natyral të brezave.
Popullsia nipone me rreth 127 milionë banorë ka filluar të ulet, dhe demografët gjykojnë se ajo do të ulet në një qind milionë deri në 2050.
*start*