Darius
DENY IGNORANCE
Vendimi i një universiteti në SHBA për të nderuar kreun e Kishës Ortodokse, Anastas Janullatos, ka provokuar zemërim tek komuniteti shqiptar që jeton në SHBA. Gazeta “Illyria” shkruan se në të njëjtën ditë me dhënien e titullit “Doktor i Nderit” në New York, është planifikuar të mbahet edhe një protestë paqësore. Kryepeshkopi i Tiranës, Durrësit dhe gjithë Shqipërisë do të jetë i ftuari i nderit në Fordham University në New York, të martën, në 28 janar 2014. Pas leksionit dhe ceremonisë së dhënies së titullit “Doktor i Nderit” nga Fordham University, do të vijohet me një pritje koktejl për nder të të ftuarit. Sipas gazetës “Illyria”, studentët nga Ballkani të Universitetit Fordham dhe alumni me origjinë shqiptare, me anë të një letre dënojnë vendimin për të nderuar kryepeshkopin Janullatos. Ata kanë dërguar një letër publike për presidentin e këtij universiteti, me titullin: “Anastas Janullatos u emërua kreu i Kishës Ortodokse Shqiptare, kundër dëshirës së popullsisë ortodokse shqiptare”. Studentët që kanë firmosur letrën kundër, shkruajnë se përfaqësojnë 4 fetë kryesore në Shqipëri dhe se i qëndrojnë besnikë traditës së paqes mes Shqipërisë dhe Greqisë. Megjithatë, në letër thuhet se kryepeshkopi Anastas nuk mishëron vlerat më të çmuara të Shqipërisë: harmoni ndërfetare dhe marrëdhënie miqësore me fqinjët. “Ne shpresojmë që, si udhëheqës i Fordham University, ju do të veproni në emër të vlerave të këtij institucioni jezuit, për të promovuar drejtësinë dhe ndjenjat e të gjithë shqiptarëve të të gjitha besimeve dhe të njihni këtë lutje, e cila buron nga dinjiteti i lindur i shqiptarëve për të drejtën e tyre, për të ushtruar besimin e tyre dhe lirinë e tyre, të ekzistojnë si të tilla në mendjen, trupin dhe shpirtin e çdo besimtari shqiptar”, – thonë në fund të letrës së tyre nxënësit e Universitetit Fordham. Por reagimet për këtë nderim të kryepeshkopit nuk janë mbyllur me kaq. Komuniteti shqiptar në Boston dhe shoqata “Kombi” në Worcester kundërshtojnë gjithashtu ashpër dhënien e një titulli të tillë. Më poshtë, në letrën e shoqatës “Komi” janë argumentuar edhe disa nga arsyet për të cilat kjo shoqatë thotë se po i bashkohet zërit të protestës së shoqatave shqiptaro-amerikane në اikago dhe New York, për demonstratën e së martës, për të dënuar vendimin për të nderuar kryepeshkopin Janullatos, nga tempulli i dijes, Universiteti Fordham në Bronx – New York. “Me mbajtjen peng të postit të kreut të Kishës Ortodokse nga Janullatos për 23 vjet, është acaruar klima e marrëdhënieve të mira midis dy popujve, shqiptar dhe grek, sepse Janullatos ka një influencë të padiskutueshme në qeverisjen e Shqipërisë, i ndihmuar si nga Athina zyrtare, ashtu edhe nga segmente të politikës së korruptuar në Athinë dhe Tiranë”,-thuhet në reagimin e këtij komuniteti. Nismën për të organizuar një protestë e ka marrë së pari organizata “Rrënjët Shqiptare”, por një numër organizatash të tjera pritet që t’i bashkëngjiten tubimit të protestës të së martës, ku flitet se edhe shqiptarë nga اikago, Detroiti, Uashingtoni, Florida dhe të tjera do të jenë në demonstratë atë ditë, përpara oborrit të kampusit të Universitetit Fordham.
Gazet Mapo