Drejtuesit e dy organizatave në mbrojtje të komunitetit LGBT në Shqipëri, “Aleanca Kundër Diskriminimit” dhe “Pro LGBT”, dolën para medias sot dhe deklaruan se i kanë kërkuar Komisioneres Kundër Diskriminimit të marrë masat më të ashpra që parashikon Ligji Kundër Diskriminimit ndaj z. Ekrem Spahiu. Ky i fundit deklaroi në një gazetë të përditshme se “Unë nuk kam ndonjë koment tjetër, vetëm t’i kap në hu ato”.
Aktivistët nënshkruan në zyrën e Komisioneres një ankesë të përbashkët kundër diskriminimit dhe nxitjes së urrejtjes të bërë nga zv/ministri i Mbrojtjes dhe u njohën nga Komisionerja Irma Baraku me faktin që institucioni i saj e ka hapur sot një investigim zyrtar ex ufficio për çështjen në fjalë.
Përveç kësaj, edhe “Pro LGBT” edhe “Aleanca Kundër Diskriminimit” po punojnë intensivisht që çështjen në fjalë ta ndjekin në Gjykatë, pasi rasti është një shkelje e Kushtetutës dhe e Nenit 266 të Kodit Penal. Sipas këtij neni, zoti Spahiu rrezikon një dënim me burg deri në 5 vjet heqje lirie. Në nen thuhet shprehimisht se “vënia në rrezik e paqes publike duke bërë thirrje për urretje kundër pjesëve të popullsisë duke i fyer, apo shpifur për to, duke kërkuar përdorimin e dhunës, ose të veprimeve arbitrare kundër tyre dënohet me gjobë, ose me burgim gjer në 5 vjet”.
“Ne jemi të vendosur që përmes juristëve por edhe konsultave me ekspertë të huaj ta çojmë këtë çështje në gjykatë dhe të kërkojmë atje dënimin maksimal, pra 5 vjet heqje lirie për z. Spahiu”, thanë përfaqësuesit e këtij komuniteti. “C’ju kanë bërë homoseksualët zotëri? Ju kanë shkelur ndonjë të drejtë? Ju kanë ofenduar? Apo ju kanë hyrë në hu…?, e pyetën publikisht ata zotin Spahia.
“Aleanca LGBT” dhe “Pro LGBT” përshëndesin deklaratën e Avokatit të Popullit z. Igli Totozani të bërë sot paradite ku e dënon ashpër deklaratën e Spahiut, si dhe gatishmërinë e znj. Irma Baraku për të investiguar mbi këtë çështje. Për këtë të fundit ne urojmë dhe besojmë se nuk ka për të përfunduar vetëm me rekomandime përkatëse por edhe me masa konkrete në rast se vërtetohet diskriminimi, gjë që në fakt, është bërë publik tashmë.
b:lajmifundit