Një histori si në filma. Kjo është ajo që ka ndodhur në një familje në Ndroq, ku gruaja ka inskenuar një skenar grabitje për të tërhequr vëmendjen e të shoqit që sipas saj e kishte lënë në harresë.
Personazh i kësaj ngjarje të pazakontë ka qenë 29 vjeçarja Daliza Azuni e cila, ka sajuar historinë e grabitjes së parave nga një hajdut i cili edhe e kishte lidhur. Por nga hetimet e policisë, u gjetën paratë të fshehura në dhomën tjetër të shtëpisë, nga vetë gruaja, duke rrëfyer se ishte lidhur po vetë me litar në karrige.
Ngjarja
Blutë e Tiranës informojnë se “rreth orës 04:40, në numrin e emergjencave 112, ka ardhur një njoftim se në fshatin Pinet, Ndroq, në banesën e shtetasit I. Azuni dyshohet se ka hyrë një person për të vjedhur, i cili duke përfituar se i zoti i banesës ishte larguar ka lidhur të shoqen shtetasen Dalina Azuni dhe më pas ka marrë në banesë shumën prej 65.000 lekësh”.
Menjëherë në adresën e dhënë janë dërguar shërbimet e Komisariatit të Policisë Nr 6, të cilët kanë filluar kontrollin e territorit dhe mbledhjen e informacioneve për autorët e mundshëm të kësaj ngjarje. Nga informacionet e marra është mësuar se bashkëshortët Azuni, prej disa kohësh nuk kishin një marrëdhënie të mirë me njëri-tjetrin.
Duke qenë përpara këtyre fakteve, Specialistët e Komisariatit të Policisë Nr 6, kanë filluar hetimin në drejtim të një kallëzimi të rremë dhe nga ku kanë arritur të faktojnë se: Pas largimit të bashkëshortit të saj, Dalina Azuni, dyshohet ti ketë fshehur në një nga dhomat e tjera shumën e lekëve, të cilat u gjetën nga kontrolli i ushtruar nga Specialistet e Policisë pas dyshimeve, më pas ka hapur dritaren e banesës dhe dyshohet se ka lajmëruar familjarët që dikush kishte hyrë në banesë.
Kur kanë shkuar familjarët e kanë konstatuar të lidhur në banesë këtë shtetase. Sipas bluve, nga intervistimi paraprak shtetësja Dalina Azuni ka pranuar se i ka bërë këto veprime vetëm për të tërhequr vëmendjen e të shoqit, pasi kishte vënë re që kohët e fundit nuk kishin komunikim dhe kishte mosmarrëveshje mes tyre.
Duke qenë përpara këtyre fakteve Specialistët e Komisariatit të Policisë nr 6, kanë bërë arrestimin e shtetases Dalina Azuni, 29 vjeçe, banuese në Tiranë. Materialet proceduriale i’u kaluan Prokurorisë pranë Gjykatës së Shkallës së parë Tiranë, për veprat penale “Kallëzim i rremë” dhe “Njoftim i rremë në organet e rendit publik”./b.l/noa.al/
