MUNICH-Një Gjykatë e Munichut ka dënuar të enjten një shqiptar 62 vjeç nga Kosova me burg të përjetshëm për vrasjen e ish-gruas së tij. Vepra penale është cilësuar si vrasje e rëndë, pasi që është kryer me thikë para syve të djalit 7-vjeçar të bashkëshortit të ri të gruas tashmë të vrarë. Fëmija ka pësuar tronditje të rëndë, ndërsa është traumatizuar edhe bashkëshorti aktual i gruas.
Këto rrethana do ta bëjnë shumë të vështirë lirimin me kusht të tij pas 15 vjet vuajtje dënimi, siç praktikohet në drejtësinë gjermane në rastet e dënimeve të përjetshme.
اifti ishte ndarë në mars të vitit 2011. Vetëm një muaj më vonë gruaja e ndarë qe martuar me të dashurin e saj që e kishte njohur në Kosovë dhe e kishte sjellë atë në Gjermani.
Kjo martesë, sipas ish-bashkëshortit, ka shërbyer si motiv për hakmarrjen e kryer më 23 korrik 2011 në oborrin e banesës në Petershausen. Në momentin kur ish- bashkëshortja kishte zbritur nga makina bashkë me fëmijën 7 vjeçar, 62 vjeçari e kishte goditur atë dy herë me thikë. Me këtë rast i kishte shkaktuar plagë në mushkëri dhe në zemër, dhe nga gjakderdhja gruaja fatkeqe ka vdekur në vendin e ngjarjes.
Ky krim tejkalon shumë mesataren e vrasjeve tjera, ka thënë kryesuesi i trupit gjykues. Sipas tij, autori e ka planifikuar për një kohë të gjatë këtë akt.
Djali 7 vjeçar dhe babai i tij që nga koha e krimit ndodhen në terapi psikiatrike.
(d.b/Koha/BalkanWeb)