Love
βeℓℓe â๓e
Qindra qytetarë, që duhet të udhëtonin të dielën dhe të hënën me avionët e kompanisë ajrore “Belleair”, kanë qëndruar për orë të tëra në aeroportin “Nënë Tereza”, pa u informuar se kompania kishte shpallur ndërkohë falimentin zyrtar, duke anuluar të gjitha fluturimet.
"Unë dua të iki në shtëpi, në Milano. Dua të shkoj në punë, por kështu po humbas punën dhe të ardhmen. Po rri në aeroport prej shumë orësh dhe nuk e di kur do të nisem", thotë një pasagjere.
"Ka edhe njerëz që nuk kanë para për të udhëtuar sepse me kompanitë e tjera janë nga 200-300 euro. Kanë mbetur në mes të udhës", thotë një tjetër zotëri.
"Ne Parodistët e Vlorës ikim për shfaqje në Torino. Shqiptarët na presin atje për shfaqje, por ne nuk ikim dot", thotë një prej parodistëve të njohur të Vlorës, edhe ai pasagjer i 'Belle Air'.
Qytetarët thonë se kanë prerë bileta deri në orën 20:30 të së dielës, kur vetë kompania kishte njoftuar se kishte bërë ndërprerjen e aktivitetit të saj.
"Deri në orën 20:30 të darkës, vijonin të prisnin biletat, kur anulimet janë bërë që në orën 16:00 të së dielës. Si ka mundësi që biletaria vijon të shesë bileta, kompania merr lekët, kur shpall një faliment", thotë një tjetër pasagjer.
Kompania ajrore “Belleair” ka anuluar mbi 10 fluturime, që duhet të kryheshin të hënën në drejtim të Italisë dhe Greqisë. E njëjta situatë, si në aeroportin “Nënë Tereza”, është paraqitur edhe para zyrave të kompanisë në Tiranë, ku qytetarët kanë kërkuar shpjegime për anulimin e udhëtimit të tyre.
Vetëm në orët e mbrëmjes është bërë i mundur transporti i pasagjerëve të parë drejt Italisë, përmes avionëve të kompanisë “Blu Panorama”. Përkundrejt pagesës shtesë prej 60 eurosh për segment, 168 pasagjerë kanë mundur të udhëtojnë nga Tirana drejt Bolonjës.
Sipas burimeve zyrtare të aeroportit, në orën 19:00 u nis një tjetër avion me 168 pasagjerë drejt Milanos, ndërsa po gjatë mbrëmjes u bë i mundur edhe transporti i pasagjerëve të linjave të Bergamos dhe Venecias.
Pjesa tjetër e qytetarëve, që do të udhëtonin të hënën drejt destinacioneve të anuluara nga “Belleair” do të bëhet i mundur të martën. Autoritetet e aeroportit konfirmojnë se kompania “Blu Panorama” do të mbulojë fluturimet e “Belleair” përgjatë të gjithë javës.
“Belle Air”, lajmi në median italiane
Enti Kombëtar për Aviacionin informon mbi pezullimin e fluturimeve
Që në mëngjesin e ditës së hënë dhe në orët e mëtejshme, Enti Kombëtar italian për Aviacionin Civil ka informuar mbi pezullimin e fluturimeve të kompanisë ajrore “Belle Air” dhe ka bërë të ditur se po ndjek e monitoron me vëmendje situatën, për të mbrojtur “interesat e pasagjerëve dhe të sektorit”.
Lajmi për pezullimin e fluturimeve zuri vend jo vetëm në mediat e specializuara, por edhe në ato kombëtare dhe lokale.
Kompania “Belle Air” lidhte Tiranën me 17 qytete italiane, nga veriu deri në jug të Italisë. E nëse në disa qytete tregu ofron edhe fluturime me kompani të tjera, ka zona ku “Belle Air” ishte e vetmja që fluturonte drejt Shqipërisë, zona që tani për tani mbeten pa fluturime direkte me kryeqytetin shqiptar.
Shtrohet problemi i Torinos dhe i zonës së Piemontes, në përgjithësi. Në këtë zonë jetojnë rreth 50 mijë shqiptarë, ka lëvizje të mëdha edhe të sipërmarrësve të shumtë, që kanë hapur biznese në Shqipëri.
Prandaj “Fly Torino”, një shoqatë qytetarësh, kërkoi urgjentisht një lidhje sa më të shpejtë dhe të qëndrueshme ajrore me Shqipërinë.
Top Channel