Edi Rama një javë prova vallëzimi para protestës, do kërcejë sot me Alketa Vejsiun
Tërhequr më 23 Prill 2010
Aristir Lumezi
Kreu socialist do të jetë sonte në spektaklin e njohur “Dancing with the stars”, që transmetohet në Vizion Plus. Edi Rama, sipas burime konfidenciale pranë këtij programi, do të ketë një vallëzim me prezantuesen e këtij spektakli, Alketa Vejsiu, por pritet të jetë dhe pjesë e jurisë, që përbëhet nga gazetarja Iva Tiço, Arjan çani dhe balerini Ilir Shaqiri. Pjesëmarrja e Ramës në këtë spektakël është mbajtur sekret dhe nuk ka asnjë informacion për të. Askush nga pjesëmarrësit në spektakël, por dhe stafi që ndihmon në realizimin e tij, nuk ka pasur dijeni për praninë e Ramës gjatë shfaqjes së sotme. Surpriza është mbajtur në një sekret hermetik, ku vetëm pak njerëz dinin se çfarë po përgatitej nga organizatorët. Madje edhe dje, gjatë provave gjenerale të puntatës së sotme të spektaklit, Rama nuk është shfaqur për të ruajtur surprizën që pritet të zbulohet vetëm gjatë shfaqjes. Në provat e djeshme gjenerale, prezantuesja Alketa Vejsiu, në provën e vallëzimit që do të ketë me Ramën, ka pasur në krah balerinin Gerti Vaso, ndërsa në prova është quajtur “Mister X”, duke shtuar edhe më shumë misterin e të ftuarit special të këtij spektakli. Vejsiu ka shkëlqyer dje në provat gjenerale në krah të Vasos, në një vallëzim klasik, ndërsa pritet performanca e saj sot, kur në krah do të ketë Edi Ramën. Dje gjatë provave gjenerale është parë dhe një karrige shtesë në tavolinën e jurisë, ku pritet që Rama të jetë pjesë e saj dhe të japë vlerësime për konkurrentët e natës së sotme. Mësohet se kryesocialisti dhe njëkohësisht kreu i Bashkisë së Tiranës, Edi Rama, ka një javë që përgatitet për këtë sfidë. Ai ka bërë prova vallëzimi me balerinin e njohur Gerti Vaso, i cili sapo është skualifikuar nga gara, ku kishte si partnere VIP këngëtaren e njohur Eli Fara. Paparazi i “Panorama” ka parë kreun e Bashkisë së Tiranës të hyjë mbrëmë vonë në palestrën që ndodhet në godinën e vjetër të Televizionit Klan, pranë Stadiumit Kombëtar “Qemal Stafa”, por nuk arriti ta fotografojë atë, për shkak të errësirës. Vallëzimin e sotëm, Rama e ka marrë shumë seriozisht. Në palestrën në godinën e vjetër të televizionit “Klan”, Rama ka shkuar çdo natë për të bërë prova baleti me Vason dhe pse situata politike është mjaft e rënduar me angazhime. Ky model spektakli në vende të ndryshme evropiane ku aplikohet, gjatë puntatave të tij, ka pasur të ftuar të tillë specialë si gazetarë, aktorë të njohur apo personalitete të politikës, si yjet e vetëm një mbrëmjeje jashtë konkurrimit. Pjesëmarrja e Ramës në këtë spektakël vjen vetëm një javë para protestës së madhe që opozita dhe socialistët kanë paralajmëruar në Tiranë. Në shumë komuna dhe bashki të vendit, qytetarët nën drejtimin e deputetëve socialistë po protestojnë për varfërimin e tyre të mëtejshëm, për shkak të rritjes së çmimeve të artikujve ushqimorë, të energjisë elektrike dhe ujit të pijshëm, por dhe për shkak të rritjes së papunësisë në vend. Sikur të mos mjaftonte vetëm kundërshtimi i opozitës për transparencën e zgjedhjeve, hapjen e kutive të votimit në disa qarqe dhe kriza ekonomike, në ndezjen e situatës politike në vend ka ndikuar dhe çështja e rikonstruksionit të sheshit “Skënderbej”, ku Qeveria dhe bashkia janë në një provë forcë për ligjshmërinë dhe funksionalitetin e sheshit, për qytetarët dhe trafikun. Pjesëmarrja e Ramës në spektaklin “Të vallëzosh me yjet”, të cilin e kanë cilësuar mbrëmë “Mister X”, vjen edhe si një përpjekje për të rritur aksionet e tij politike, jo vetëm përpara protestës së madhe, por dhe vazhdimit të bojkotit të Parlamentit nga deputetët socialistë.
