Delegacioni i Kosovës mbi 50 takime në New York

Presidenti i Kosovës, Fatmir Sejdiu, dhe ministri i Jashtëm, Skënder Hyseni, thonë se të hënën fillojnë një agjendë të ngjeshur takimesh në New York.

Ata nuk i kanë bërë publike hollësitë, por zëdhënësja e Ministrisë së Jashtme në Prishtinë, Albana Beqiri, ka thënë se presidenti dhe ministri i Jashtëm do të kenë të paktën 50 takime me presidentë, kryeministra dhe ministra te jashtëm të vendeve që nuk e kanë njohur Kosovën.

Kreu i shtetit dhe ai i diplomacisë së Kosovës shpresojnë se brenda dhjetë ditëve të ardhshme do të arrijnë që të sigurojnë njohje të reja të shtetit të Kosovës.

Ndërkohë, të hënën në New York shkojnë edhe presidenti i Serbisë, Boris Tadiq, si dhe ai ë Shqipërisë, Bamir Topi.

Topi do të flasë në Asamblenë e Përgjithshme edhe për Kosovën.

Presidenti serb Tadiq, në prag të nisjes për në New York, ka thënë se do të ishte mirë që çështja e Kosovës të mos trajtohej si çështje politike por e drejtësisë ndërkombëtare.

Tadiq do të flasë të martën në Asamblenë e Përgjithshme. Fjalimi i tij pritet të përqendrohet në nismën më të fundit të Serbisë që Gjykata Ndërkombëtare të japë vlerësimin e saj për ligjshmërinë e shpalljes së pavarësisë së Kosovës. /bbc/