“Equus”, vepra që ngre pikëpyetjen nëse duhet t’i edukojmë fëmijët për të qenë normalë
Teatri Kombëtar sjell në datën 17 premierën e veprës “Equus” e konsideruar një nga kryeveprat e autorit anglez Peter Shaffer dhe e sjellë në skenë nga regjisori i mirënjohur boshnjak Dino Mustafic.
‘’Equus’’ është udhëtimi i mendjes së një djaloshi, i cili me një çengel verbon gjashtë kuaj. Historia flet për marrëdhënien e një psikiatri me pacientin e tij adoleshent, i cili pasionin e tij për kuajt e tregon me verbimin e tyre.
Fokusi i veprës bie mbi një shtatëmbëdhjetëvjeçar, Alan Strang, dhe Martin Dysard, psikiatër i moshës së mesme, i cili pranon ta kurojë atë.
Gradualisht ai zbulon arsyet të cilat shtynë djalin të kryejë krimin.
Doktori sa më shumë i afrohet pacientit dhe kupton motivet e tij, aq më shumë shqetësohet se si duhet të sillet me Alanin dhe “botën e tij të brendshme’’ të cilën djali e ka krijuar në kokën e tij duke vënë në pikëpyetje motivin profesional, madje edhe vetë ekzistencën e tij.
Nëpërmjet raportit me fenë.
Alani krijon perëndinë e tij “Equus”, dhe ritualin personal.
Magjepsjen e tij për të mbinatyrshmen ai e ngatërron me tërheqjen seksuale. Konfuzioni i tij u lë hapësirë pyetjeve mbi marrëdhënien në mes vlerës personale dhe normave shoqërore.
Shfaqja vjen në formën e një trilleri psikologjik (histori hetimi) ndërthurur me elemente të thella humori.
‘’Equus’’ ngre dilemën: اfarë është normale?
A duhet t’i edukojmë fëmijët për të qenë normalë?
Humori, imazhet e forta dhe mjetet dramatike përcjellin qartë tema të rëndësishme, si dhe theksojnë qëndrimin ndaj çështjeve për të cilat kjo shfaqje flet: mungesa e qytetarisë, morali i rremë, erotizmi, fashizmi i të gjitha ideologjive, pandjeshmëria e shoqërisë ndaj të ndryshmes.
Vetë shkrimtari i veprës, Peter Shaffer, ka shkruar skenarin e filmit me të njëjtin titull, bazuar mbi veprën dramatike. Në skenën e Teatrit Kombëtar për interpretimin e personazheve të kësaj vepre do të ngjiten disa nga aktorët më të mirë shqiptarë si: Timo Flloko, Igli Zarka, Ema Andrea, Arben Derhemi, Krist Lleshi, Luli Bitri, Lulzim Zeqja, Erjona Kakeli, Ermir Jonka, Robert Nuha, Fjorald Doçi, Akreoma Saliu dhe Gridi Kraja. Kjo shfaqje do të mirëpresë të gjithë publikun mbi moshën 16 vjeç./Blitz.al/
askush nuk ka gjak te tepert per ta perdorur ne skena aktrimi.
