Cigarja elektronike, a është një alternativë e shëndetshme?!
Shiko fotografinë 1816971 Pavarësisht se tashmë ka dalë në modë, kanë filluar që të bëhen edhe prova nëse vërtet një shpikje e tillë ndihmon për të lënë cigaren dhe nëse bën mirë për shëndetin
Gazmira Sokoli
Një alternativë më e shëndetshme se cigarja? Një mundësi për të lënë cigaren e vërtetë? Apo një produkt i dëmshëm? Janë shumë pyetjet që kanë lindur lidhur me cigaren elektronike, një produkt tashmë i përhapur në të gjitha vendet e botës. ثshtë gjithnjë e në rritje numri i atyre që kalojnë nga tymi te nxehtësia e cigares elektronike, e cila për më tepër lejon ruajtjen e gjestit aq të dashur për duhanpirësit: mbajtjen e cigares në dorë edhe në ambiente të mbyllura, si zyrat apo restorantet.
Nuk janë pak ish-duhanpirësit që kanë hedhur në koshin e plehrave paketën e fundit falë ndihmës së cigares elektronike. Madje, është fakt se e-cig (shkurtimi për cigare elektronike), e konsideruar si e padëmshme, ka tërhequr edhe një numër joduhanpirësish, që kanë filluar të eksperimentojnë shijet e ndryshme, njësoj siç bëhet me nargjilenë në vendet arabe.
Por pyetja që qëndron në thelb është, nëse ky produkt i ri i bën mirë apo dëm shëndetit? Dhe nëse janë efektive apo jo për t’i thënë lamtumirë njëherë e përgjithmonë duhanit?
Modele të ndryshme
Pavarësisht se specialistët e kësaj fushe nuk janë të shumtë, disa prej tyre janë duke pritur rezultatet e studimeve për të dhënë një përgjigje të qartë. E vetmja përgjigje është se pa pasur rezultatet e testeve të kryera, nuk mund të thuhet me plot gojën se cigarja elektronike është një alternativë e dobishme për lënien e duhanit. Megjithatë, është thelbësore të kuptohet se nuk mund të flitet në përgjithësi për cigare elektronike, pasi ekzistojnë modele të ndryshme, me përbërës të ndryshëm. Praktikisht, mekanizmi i funksionimit është i vetmi tipar i përbashkët që cigaret elektronike kanë. Përbërja, pra ajo çka thithet nga përdoruesi, mund të jetë e dëmshme (në varësi të cilësisë dhe sasisë së substancave në përbërje).
Si është një cigare elektronike?
Të gjitha modelet e cigares elektronike janë të përbëra nga një bateri, vaporizatori dhe një karton dhe pjesa që i ngjan fishekut. Pjesa e parë e cigares, pra, ajo ku zakonisht ndodhet përbërja e duhanit, është e karikueshme dhe mund të zgjasë nga 70 deri në 150 thithje, kjo në varësi të modelit. Shumë prej modeleve që gjenden në shitje, kanë një dritë të kuqe në majë, e cila ndriçon në çdo tërheqje, gjë që shërben për të krijuar idenë se po pi një cigare të vërtetë, por edhe tregon gjendjen e baterisë. Vaporizatori prodhon nxehtësinë, e cila duke kaluar në pjesën cilindrike bashkohet me shijen dhe aromën e zgjedhur nga blerësi. Por kjo nuk do të thotë se konsumohet vetëm avull uji, siç mund të mendojnë disa, por nxehtësia e prodhuar nga glicerina vegjetale apo gliceroli. Dhe sigurisht nuk mungon nikotina, e cila duke qenë një substancë psikoaktive, krijon varësi njësoj si ajo e cigareve normale.
Në pritje të rezultateve, bëni kujdes me markat
Në përfundim, shumë specialistë bien dakord se duhet bërë kujdes me varësinë. Kush nuk ka pirë kurrë duhan, është më mirë të qëndrojë larg këtyre produkteve. Të dëmshme apo jo, përse të rrezikojnë? Gjithsesi, nuk duhet menduar sikur ke të bësh me një lojë. Ndërsa për ata që duan të lënë duhanin e vërtetë, diskutimi është një tjetër.
“Akoma nuk e dimë nëse cigaret elektronike janë një instrument për lënien e duhanit. Për shembull, ruajtja e gjestit tipik në fillim mund të jetë e dobishme, por më vonë mund të bëhet kritike, pasi vesi i duhanpirjes vazhdon. Nga ana tjetër, cigaret elektronike përmbajnë nikotinë, e cila mund të përdoret si dozë në rënie, siç bëhet me ilaçet që rekomandohen në krizat e abstinencës tek disa duhanpirës. Duhet pasur parasysh se një cigare normale përmban shumë substanca, mes të cilave disa janë edhe kancerogjene ose toksike, ndërsa cigaret elektronike këto i kanë në sasi shumë të vogla.
Sigurisht që gjithçka varet nga përdorimi dhe për ata që vendosin t’i thonë lamtumirë duhanit, është një fillim i mirë në krahasim me asnjë përpjekje. Por rruga më e mirë është ndjekja e metodave të aprovuara: ilaçet apo këshillimi psikologjik.
Në fund, një paralajmërim: Të gjithë ata që vendosin ta blejnë cigaren elektronike duhet fillimisht të kontrollojnë për markën e garancisë së Komunitetit Europian (CE), çka tregon se nuk kemi të bëjmë me një produkt fals.
Une per vete jam perpjek por ce do se kam len dot 
...
